Artur Andrysiak nomedu nu’udar Diretór foun BAD iha Timor-Leste
DILI, 20 Agostu 2026 (TATOLI) – Banku Aziátiku Dezenvolvimentu (BAD) nomeia Artur Andrysiak nu’udar Diretór Nasionál BAD ba Timor-Leste, hodi substitui Stefania Dina, ne’ebé lidera ona eskritóriu instituisaun finanseira multilaterál ne’e dezde tinan 2023.
Andrysiak hahú nia knaar foun iha Dili iha loron 17 Agostu 2026. Iha pozisaun ida-ne’e, nia sei lidera operasaun hothotu BAD nian iha Timor-Leste, inklui tau-matan ba envolvimentu Governu nian, dezenvolvimentu programa, no implementasaun solusaun setór públiku no privadu hodi apoia prioridade dezenvolvimentu nasionál.
BAD afirma katak diretór foun ne’e sei responsabiliza mós ba hametin relasaun ho parseiru sira no lidera gabinete reprezentativu BAD nian iha Timor-Leste, ne’ebé abranje área serbisu lubuk ida.
“BAD sai nu’udar parseiru ida ne’ebé metin iha Timor-Leste nia dezenvolvimentu, hasa’e infraestrutura reziliente no servisu báziku sira, promove kreximentu ne’ebé lidera husi setór privadu, no apoia diversifikasaun ekonómika”, Artur Andrysiak dehan iha komunikadu ne’ebé Tatoli asesu, ohin.
Nia sente onradu atu lidera BAD nia envolvimentu kontinua iha Timor-Leste no hein atu serbisu besik ho Governu Timor-Leste, parseiru dezenvolvimentu sira, no komunidade hodi tulun atinje meta dezenvolvimentu nasaun nian no entrega impaktu sustentavel ba sosiedade.
Andrysiak iha esperiénsia profisionál liu tinan 26 iha nivel nasionál no internasionál iha pozisaun jestaun, lideransa, no tékniku oioin, inklui tinan 14 iha BAD.
Dezde tama iha BAD iha 2012, nia serbisu ona iha departamentu rejionál no operasionál oioin, inklui Departamentu Ekonomia no Peskiza, Departamentu Estratéjia, Polítika, no Parseria sira, no Departamentu Pasífiku. Nia mós serbisu nu’udar Diretór-Adjuntu Nasionál BAD nian ba Afeganistaun.
Molok mai Timor-Leste, Andrysiak hala’o knaar nu’udar Diretór Nasionál BAD nian ba Turkmenistan durante tinan haat. Iha ne’ebá, nia hametin parseria estratéjika BAD nian ho Governu lokál no tau-matan ba implementasaun projetu no programa dezenvolvimentu oioin banku nian.
Antes tama iha BAD, Andrysiak serbisu nu’udar estatístiku iha Komisaun Ekonómika no Sosiál Nasaun Unida nian ba Ázia no Pasífiku (UNESCAP), Komisaun Ekonómika Nasaun Unida nian ba Europa (UNECE), no Gabinete Estatístika Austrália nian.
Sidadaun Austrália ne’e hasai mestradu iha área jestaun no kontabilidade husi Universidade Nasionál Austrália no lisensiatura iha área ekonomia no finansa husi Universidade Edith.
BAD hanesan banku dezenvolvimentu multilaterál ne’ebé fó apoiu ba dezenvolvimentu sustentavel, inkluzivu, no reziliente iha rejiaun Ázia no Pasífiku. Harii iha tinan 1966 no instituisaun ne’e agora iha nasaun membru 69, inklui 50 husi rejiaun Ázia no Pasífiku.
Jornalista: Arminda Fonseca
Editora: Maria Auxiliadora
