Kampung Alor rejista ona uma-kain 665 ba despezu administrativu
DÍLI, 20 Agostu 2026 (TATOLI) – Uma-kain hamutuk 665 iha área Aitarak Laran, Suku Kampung Alor, Postu Administrativu Dom Aleixo, Munisípiu Dili, rejistu hotu ona ba prosesu despeizu administrativu.
Xefe Suku Kampung Alor, Estela Aleixo, hatete katak prosesu rejistu ba uma kain sira ne’e remata ona tuir planu ne’ebé autoridade kompetente sira estabelese.
Nia hatete katak agora autoridade lokál no komunidade sira hein termu aseitasaun husi Governu, liuhusi Ministériu Obras Públiku, atu bele kontinua ho prosesu administrativu.
“Ami rejistu hotu ona uma-kain 665 iha Aitarak Laran, no dadaun ami hein hela termu aseitasaun atu bele implementa prosesu despeizu administrativu tuir regulamentu no prosedimentu legál sira ne’ebé vigora,” hatete Estela.
Nia esplika katak Governu no autoridade lokal sira kontinua halo koordenasaun ho komunidade atu asegura prosesu ne’e lao ho di’ak, transparente no respeita direitu sidadaun sira nian.
Estela mós husu ba família sira ne’ebé rejistu ona atu kontinua kolabora ho autoridade sira no prepara kartaun eleitorál, dokumentu nesesáriu sira seluk, bainhira presiza, atu fasilita prosesu indemnizasaun.
Molok ne’e, Governu liuhusi Sekretaria Estadu ba Assuntu Toponímia no Organizasaun Urbana (SEATOU), iha inísiu fulan Agostu, notifika ona uma kain hamutuk 665 iha área Aitarak Laran kona-ba prosesu ne’e.
Notifikasaun ne’e halo atu hahú prosesu hamamuk fatin, hodi fó espasu ba Governu atu hala’o projetu dezenvolvimentu iha Timor-Leste ba interese Estadu no interese públiku.
Jornalista: Camilio de Sousa
Editór: Filomeno Martins
