Brazíl sei apoia Programa Pós-Graduasaun iha UNTL
DILI, 21 Agostu 2026 (TATOLI)–Prezidente Repúblika José Ramos-Horta, sesta ne’e, hasoru malu ho Diretór Ajénsia Kooperasaun Brazileira (ABC), Ruy Pereira, hodi ko’alia kona-ba planu estratéjiku kooperasuan no sei apoiu Pos Graduasaun Universidade Nasionál Timor-Lorosa’e (UNTL).
“Ami mai atu reafirma Brazíl nia kompromisu ba Timor-Leste liuliu iha área edukasaun no lian portugés. Ami konkorda atu haforsa parseria ho UNTL hodi estabelese programa mestradu no doutoramentu iha rai laran,” Diretór ABC, Ruy Pereira, hateten ba jornalista sira iha Palásiu Prezidensiál hafoin ramata enkontru ho Xefe Estadu.
Delegasaun ne’e elojia lideransa esperiénsia husi Prezidente no reafirma kompromisu naruk Brazíl nian ba dezenvolvimentu estruturál no inkluzaun sosiál iha Timor-Leste.
Foku sentrál husi enkontru ne’e mak atu hametin lian portugés, ne’ebé Prezidente Ramos-Horta defende nu’udar pilár definidór ba identidade nasionál timoroan.
Parte rua ne’e konkorda atu haforsa inisiativa edukasionál sira ne’ebé la’o hela atu promove lian ne’e iha nível aprendizajen hotu-hotu, husi edukasaun bázika to’o nível universidade.
Atu apoia vizaun konjunta ne’e, Brazíl hametin liután ninia parseria akadémika sira ho UNTL.
Ho apoiu kolaborativu husi universidade federál prinsipál sira husi Brazíl, kooperasaun ne’e sei kontribui diretamente ba estabelesimentu programa pós-graduasaun, mestradu no doutoramentu foun iha rai laran.
Ruy Pereira subliña katak kooperasaun ne’e sei envolve universidade federál prinsipál sira husi Brazíl hodi fó apoiu tékniku no akadémiku ba Timor-Leste.
TATOLI
