DNTT kontinua implementa dekretu-lei kona-ba taxa administrative ba transporte

DILI, 21 Agostu 2026 (TATOLI)—Xefe Departamentu Sekretariadu Apoiu Tékniku Administrasaun Diresaun Nasionál Transporte Terrestre (DNTT), Nelson Martins, hateten durante ne’e DNTT kontinua implementa dekretu-lei ñú. 17/2026 kona-ba “Taxa administrativu ba transporte”.

Nia hatutan, hanesan Ministru Transporte Komunikasaun, Miguel Gonçalves Manetelu, fó sai ona katak sei mantein dekretu-lei nú. 17/2026 signifika la atltera maibé sei hadi’a de’it artigu balun.

“Tanba rekomendasaun husi EUTL nian ne’e sei hadi’a artigu balun de’it maibé sei hadi’a iha tempu tuir mai tanba bainhira dekretu-lei ne’e promulga ona, entaun hafoin tinan rua mak foin hadi’a no sira mós iha tenke ajusta didi’ak artigu sira,” Xefe Tékniku DNTT relata ba jornalista sira iha Ministériu Finansa, ohin.

Nia hatutan, artigu ne’ebé atu hadi’a ne’e mak bainhira sira sente afeta liu ba komunidade hirak ne’ebé ninia rendimentu kiik, entaun ninia prosesu hotu ne’e hein to’o loron ruma sei fó sai ba públiku sira.

“Enkuantu dekretu-lei ne’e daudaun ne’e DNTT implementa la’o normál hela tanba bainhira ami uza fali dekretu lei ida tuan ne’e (anterior) entaun sira kontra ona regras ka kobrasa ilegál”, nia esplika.

Jornalista : Alexandra da Costa

Editór        : Cancio Ximenes