Governu atualiza preparasaun OJE 2027 ba Xefe Estadu
DILI, 21 Agostu 2026 (TATOLI)–Primeiru-Ministru, Kay Rala Xanana Gusmão, sesta ne’e, iha Palásiu Prezidensiál, Nicolau Lobato, Bairru Pite, Dili, hodi atualiza progresu servisu Governu nian liuliu kona-ba preparasaun Orsamentu Jerál Estadu (OJE) 2027 ba Prezidente Repúblika, José Ramos-Horta.
“Ha’u informa mós ba Prezidente Repúblika katak ami iha hela Orsamentu Jerál Estadu prepara ba 2027 nian. Atu hadi’a tia problema ida kona-ba hatama de’it, laiha vizaun anuál nian, ne’e mak ami hala’o hela. Maibé, klaru, ita hotu hatene, hotu-hotu hakarak halo hotu-hotu maibé buat ne’e mós la’o ladún, entaun ita tenke haree hadi’a,” Primeiru-Ministru, Kay Rala Xanana Gusmão, hateten ba jornalista sira.
Xefe Governu informa katak Governu hahú ona vizita ba projetu infraestrutura sira-ne’ebé sei hala’o daudaun maibé seidauk ramata.
“Horisehik ami la’o uitoan haree ba infraestrutura ne’ebé hala’o daudauk maibé seidauk hotu. Ami haree katak se bele karik to’o iha tinan ida-ne’e nia rohan ne’e, buat sira-ne’e atu hotu tiha,” nia hateten.
Iha parte seluk, Xanana Gusmão mós informa ba Xefe estadu kona-ba apoiu husi nasaun membru CPLP nian.
“Ko’alia kona-ba CPLP, sira kontente. Sira mós apresia tebe-tebes ita nia preparasaun ho ita-nia lojístika, buat sira-ne’e hotu,” nia dehan.
Primeiru-Ministru haktuir, Embaixadór Repúblika Kabu Verde hateten nasaun ne’e hakarak loke Embaixada ida iha Timor-Leste.
“Ho Embaixadór Kabu Verde nia temi katak sira mós hakarak loke Embaixada ida iha ne’e. Ne’ebé nia mós oferese dehan iha área justisa, edukasaun no área seluk sira bele fó apoiu. Ha’u dehan tiha ona katak, depois sei haruka tékniku sira ba haree saida mak ita bele hahú kooperasaun di’ak ida ho Kabu Verde,” Xanana esplika.
Iha biban ne’e, Xefe Governu Xanana Gusmão mós atulaiza kona-ba rezulatdu enkontru ho Ministru Negósiu Estranjeiru Portugál nian ba Xefe Estadu.
“Hasoru malu ho Ministru Negósiu Estranjeiru Portugál nian. Nia ko’alia tiha ona ba imi, sei buka hakaas aan atu asisténsia ne’ebé sira fó iha área direitu,” nia hateten.
Xanana haktuir tan katak, tanba iha joven lubuk mak estuda daudaun iha Portugál, parte rua mós ko’alia kona-ba harii Eskola Portugeza iha Kaikoli.
“Tanba ita-nia joven lubuk iha Portugál ona, estuda daudaun. Sira mós atu tama kona-ba Eskola Portugeza ne’ebé atu harii iha Kaikoli ne’eba, sira mós sei haree ida-ne’e,” nia dehan.
Jornalista : Hortêncio Sanchez
Editór : Cancio Ximenes
