Haloot matebian Silvano Gomes, autoridade-família husu tribunál fó pena todan ba oknun PNTL
VIKEKE, 21 Agostu 2026 (TATOLI)—Iha serimónia haloot matebian Silvano Gomes ne’ebé hetan tiru husi oknum membru PNTL foin lalais iha Postu Uatukarbau, Munisípiu Vikeke, autoridade no família sira husu tribunál tenke fó pena ba oknun PNTL ne’ebé halakon ema-nia vida.
Portavóz Autoridade Suku Irbin de Baixo, Atuál Xefe Aldeia Beturia, Suku Irabin de Baixo, Postu Uatukarbau, Munisípiu Vikeke, Manuel Julio Gomes, haktuir autoridade lokál no família sira husi matebian Silvano Gomes sente lamenta kona-ba kazu oknun Polísia Nasionál Timor-Leste(PNTL) utiliza arma tiru joven husi kotuk to’o borus iha parte kabun ne’ebé sai grave, ikusmai hakotu-iis.
Notísia relevante: Silvino Gomes ne’ebé hetan tiru husi oknum PNTL hakotu ona iis
“Husi akontesimentu ne’e matebian ho motorizeda husi Suku Irabin de Baixo viajen bá Suku Uani-Uma, maibé la uza kapasete iha estrada públiku, nune’e iha momentu ne’ebá membru PNTL hala’o hela nia knaar iha Eskola 013 Uatukar nian oin, bainhira vítima fila husi Suku Uani Uma mak oknun PNTL para netik vítima tanba la uza kapasete. Nune’e, oknun PNTL foti arma tiru vítima parte kotuk to’o borus sai iha kabun no vítima monu ho distánsia metru 150 iha fatin akontesimentu. Hafoin akontese, polísia abandona vítima ho kondisaun grave. Asaun PNTL ida-ne’e ami konsidera aktu kriminál, la kumprimenta misaun PNTL nian tanba sira-nia misaun hatuur ona iha lei orgánika PNT,” Manuel hateten liuhusi komunikadu imprensa, molok lori mate-isin ba haloot iha semitériu públiku, ih Suku Irabin de Baixo, Sesta ne’e.
Bazeia ba Dekretu Lei Orgánika PNTL Númeru: 55/2002, 03 Agostu, iha klázula 5 katak defende legalidade demokrátiku no grantia seguransa ba sidadaun sira tenke tuir Konstituisaun RDTL.
Nune’e mós, nia dehan, Lei Tranzitu Kódigu Estrada Nú: 6/2003, atu fó garantia seguransa rodoviária no orden públika bainhira sidadaun sira viola Kódigu Estrada, PNTL foti medida infrasaun ba sidadaun sira la’ós uza arma hodi hakanek no halakon sidadaun sira-nia vida.
“PNTL uza patrimóniu Estadu atu serbí povu no proteje povu bainhira violénsia ruma akontese, más la’ós uza arma hodi akuza sidadaun sira ho asaun burtalizmu. Ida-ne’e ami konsidera pratika burtalizmu hasoru ita-nia sidadaun,” nia subliña.
Iha fatin hanesan, vítima Silvano Gomes nia maun, Reinaldo Basílio, sente triste lakon alin ne’ebé oknun PNTL tiru iha Postu Uatukarbau too ikusmai hakotu vida.
“Ami família sente triste tanba ami lakon ona ami-nia alin, maibé to’o agora komandu PNTL Munisípiu Vikeke seidauk hato’o buat ruma ba família sira. Nune’e, ami husu PNTL presiza klarifika buat ruma ba ami família sira, atubele hatene kauza tiru ami-nia alin ida-ne’e. Ami mós husu komandu PNTL tau-matan ba vítima Silvano tanba matebian husik nia oan na’in-rua,” nia informa.
Reinaldo haktuir prosesu fúnebre ne’e, parte PNTL apoia kaisaun, foos no supermie ba família vítima.
Tuir observasaun TATOLI katak iha serimónia fúnebre matebian Silvano Gomes, situasaun la’o hakmatek tanba hetan seguransa husi membru PNTL Munisípiu Vikeke, akompaña husi Unidade Tránzitu no hetan apoia seguransa husi Batallaun Orden Públika (BOP) ne’ebé destaka kuaze semana ida iha Postu Uatukarbau.
Enkuantu, akontesimentu oknum PNTL tiru vítima Silvano Gomes ho idade 30 husi Aldeia Beturia, Suku Irabin de Baixo, akontese iha loron Sábadu (15/08), maizumenus tuku 08:00 Otl, tiru iha parte kotuk to’o borus iha kabun.
Jornalista: Vitorino Lopes da Costa
Editór: Xisto Freitas da Piedade
