IGEADI normaliza estrada Raiheu atu fasilita movimentasaun komunidade
BOBONARU, 21 Agostu 2026 (TATOLI) – Institutu Jestaun Ekipamentu no Apoia Dezenvolvimentu Infraestrutura (IGEADI) Brigada Maria Tapó halo ona normalizasaun ba estrada ligasaun suku Raiheu, postu administrativu Kailaku, munisípiu Bobonaru, hodi fasilita movimentasaun públiku ba atividade ekonomia, sosiál no saúde.
Xefe Suku Raiheu, Ventura Maria Tai, hatete normalizasaun ne’ebé IGEADI halo hodi haluan tan dalan ne’ebé foin lalais hetan danu tanba kauza husi dezastre naturál.
“IGEADI agora mai halo ona normalizasaun. Sira-nia serbisu sei la’o hela, agora foin loron haat. Dalan sira uluk grave ne’e sira hadi’a, ida uluk fatuk-dalan Ministra Solidariedade Sosiál mai no sasán lalin de’it ne’e agora hotu ona. Hela mak ida sorin mai ne’e, ohin sira mai ona para hadi’a”, nia informa ba Tatoli.
Daudaun ne’e, karreta bele asesu ona bá suku Raiheu, Atura no Meligo. “Foin lalais komunidade ho inisiativa rasik kee, karreta no motór liu bá-mai hela, más IGEADI mai tan normaliza ne’e sei loke halo luan. Maibé, hanesan autoridade lokál ami agradese tebes ba IGEADI, ba ita-nia apoiu, inklui ba mídia Tatoli no RTTL ne’ebé sempre hakbesik mai sai matan-tilun no ibun mai ami, ohin loron hadi’ak ona dalan ne’e”, nia hato’o.
Biban ne’e, Xefe Suku Raiheu rekomenda ba Ministériu Obra Públika atu konsidera dalan hodi tau iha planu orsamentu tinan 2027, tanba estrada ne’e liga mós ba fatin istóriku no importante ne’ebé ba futuru sei hetan vizita husi ema estranjeiru.
Notísia relevante: Estrada a’at, obrigada idozus sira iha Raiheu la’o ain ba simu subsidiu
“Ami-nia proposta hato’o ona ba Ministériu Obra Públika no Ajénsia Dezenvolvimentu Nasionál. Ami rekomenda ida-ne’e tanba dalan ne’e públiku, aproveita ho monumentu saudozu Nino Konis Santa ho fósil iktiossauru iha foho Lesululi ne’e, entaun ita tenke tau-matan, nune’e ita-nia bainaka sira bele liu iha estrada ne’ebé di’ak”, dehan.
Rekorde katak iha fulan hirak liubá, komunidade hulan inan isin-rua husi suku Raiheu to’o área Hali-mesak tanba kondisaun estrada aat, maibé to’o Ospitál Referénsia Maliana la konsege sala bebé nia vida.
Notísia relevante: Distánsia no estrada aat kauza bebé lakon vida
Jornalista: Sergio da Cruz
Editora: Maria Auxiliadora
