Institutu Bambú investe rekursu umanu atu aumenta produsaun Bambú iha rai-laran
DILI, 21 Agostu 2026 (TATOLI)—Diretór Ezekutivu Institutu Públiku Peskiza Dezenvolvimentu Formasaun no Promosaun Bambú (IPDFPB), Abílio Barros, hateten iha aniversáriu ezisténsia instituisaun Bambú nian ba da-17, sira hakarak kontinua investe rekursu umanu hodi aumenta produsaun bambú iha rai-laran nomós iha rai-li’ur.
Diretór Ezekutivu Institutu Bambú, Abílio Barros, hateten ho ezisténsia tinan 17 sira sente progresu servisu sira-ne’ebé iha la’ós sira mesak mak halo maibé servisu integradu ho parséria sira, ne’ebé sai forsa ida hodi apoiu ba planu estratéjiku atu responde ba indústria.
“Ko’alia kona-ba progresu ami foin halo instalasaun ba investimentu rekursu umanu (ema) tanba funsionamentu servisu ne’e hala’o husi ema, tanba papel husi instituisaun ne’e rasik mak peskiza, dezenvolve informasaun, promosaun bambú (indústria),” Diretór Abílio Barros informa ba Agência Tatoli iha Jardin Prezidente Repúblika B.J. Habibie, ohin.
Dirijente ne’e dehan, formasaun ne’ebé durante ne’e sira fó iha área potensia oioin hanesan artezanatu, ambientál no karpintária, atu promove sai indústria ne’ebé boot hodi responde ba merkadu doméstika, rejionál no internasionál.
“Durante ne’e produsaun bambú ne’ebé iha ami investe ona ba entidade privadu sira no entidade públiku sira. Dezáfiu ne’ebé ami hasoru mak viveiru bambú kuaze 45 barak mak animál sira han estraga tanba lutu laiha no laiha kontrolasaun másimu husi ema,” nia dehan.
Tanba ne’e, sira iha polítika atu kuda fali viveiru bambú iha rai purvolta 3.000 ektaré iha territóriu nasionál.
Enkuantu iha selebrasaun aniversáriu Institutu bambú ba da-17 ne’e sira konsege realiza ona atividade hanesan sensibilizasaun no feira ba parséria sira hodi faan ida-idak nia produtu.
Jornalista : Alexandra da Costa
Editór : Cancio Ximenes
