Jestaun Merkadu Manleuana husu negosiante sira atu kuida sanitáriu públiku
DÍLI, 21 Agostu 2026 (TATOLI) – Jestór Merkadu Manleuana, Elias Barros, husu negosiante sira hotu atu uza sanitáriu públiku ne’ebé disponivel iha merkadu ho responsabilidade no mantein limpeza hodi asegura saúde no ambiente mós ba utilizadór hotu.
Elias hateten katak sintina públika ne’e patrimóniu públiku ne’ebé Governu disponibiliza hodi atende nesesidade negosiante no vizitante sira iha Merkadu Manleuana.
Tanba ne’e, nia husu ba utilizadór sira atu mantein kultura limpeza no kuida fasilidade públika sira atu bele uza ba tempu naruk.
“Iha Merkadu Manleuana ita iha ona sintina públika hamutuk neen ho sistema kanalizasaun bee ne’ebé di’ak. Tanba ne’e, ha’u husu ba negosiante sira atu uza sintina públika ho di’ak, labele soe fo’er arbiru no tenke hamoos hafoin uza sintina,” dehan Elias.
Nia mós hateten katak ekipa jestaun merkadu, hamutuk ema na’in hitu, kontinua halo monitorizasaun no manutensaun regulár ba sintina públika sira.
Maibé, Elias subliña katak kooperasaun husi utilizadór sira importante tebes atu garante fasilidade sira ne’e nafatin iha kondisaun di’ak.
Jestaun Merkadu Manleuana hein katak konsiénsia no responsabilidade hamutuk entre jestaun no utilizadór sira bele ajuda kria ambiente merkadu ne’ebé moos, saudável no konfortável ba komunidade tomak.
Iha parte seluk, porta-voz negosiante Merkadu Manleuana, Octávio Lopes, hato’o agradese ba Governu liuhusi Autoridade Munisípiu Dili tanba fasilita sintina públika ba negosiante sira iha merkadu.
“Ami agradese ba Governu liuhusi Autoridade Munisípiu Dili ne’ebé fasilita ona sintina públika ba ami negosiante sira iha Merkadu Manleuana. Ami sei kumpre no kontinua hamoos fasilidade sira ne’e hodi garante ijiene no saúde públika iha Merkadu Manleuana,” nia konklui.
Sintina públika iha Merkadu Manleuana hamutuk unidade neen, ne’ebé utiliza husi negosiante na’in 1,500 resin no vizitante sira ne’ebé mai vizita merkadu.
Jornalista: Camilio de Sousa
Editór: Filomeno Martins
