Ramos-Horta Kondekora Medalla Orden TL ba Ofisiál Polísia Austrália
DILI, 21 Agostu 2026 (TATOLI)–Prezidente Repúblika, José Ramos-Horta, kondekora Medalla Orden Timor-Leste ba Sarjentu-Xefe Akademia Polísia Perth nian, Timothy Ian Britten, sesta loraik iha Palásiu Prezidensiál Nicolau Lobato, Bairru Pite Dili.
“Ita fó onra ba Sarjentu-Xefe Britten nia destakamentu mai Timor-Leste hanesan parte ida husi Misaun Apoiu Nasoins Unidas nian iha Timor-Leste (UNMISET), hafoin restaurasaun independénsia Timor-Leste nian,” Xefe Estadu hateten iha serimónia liuhusi nia diskursu.
Orden Timor-Leste mak nasaun nia onra aas liu, ne’ebé fó ba individuál sira-ne’ebé hala’o ona servisu esepsionál no meritóriu ba nasaun. Sarjentu-Xefe Timothy Ian Britten simu Medalla Orden Timor-Leste tuir Dekretu Prezidente Repúblika Nú. 94/2026, nu’udar rekoñesimentu ba ninia servisu distintu ba Timor-Leste durante períodu krítiku hafoin restaurasaun independénsia nasaun nian.
Sarjentu-Xefe Timothy Ian Britten maka Sarjentu Superiór ida iha Polísia Austrália Osidentál no oras ne’e daudaun hanesan ofisiál polísia ne’ebé dekoradu liu iha Austrália.
Nia iha kompromisu kleur ona ba servisu públiku no ba povu rejiaun nian. Nia koñesidu iha Austrália tanba nia aten-barani durante Bomba Bali iha tinan 2002. Tempu ne’eba nia iha Bali hodi foti lisensa deskansu no rekreasaun (R&R) husi misaun manutensaun pás nian iha Timor-Leste.
Durante atake, nia tama beibeik ba iha área Sari Club ne’ebé estragadu hodi salva ema sira ne’ebé kanek.
Tuir mai nia simu prémiu The Cross of Valour, Austrália nia kondekorasaun ba sivíl aten-barani ne’ebé aas liu. The Cross of Valour mak prémiu ne’ebé la komún, foin atribuida dala lima iha Austrália dezde estabelesimentu sistema kondekorasaun australianu nian iha tinan 1975.
“Durante nia misaun, nia servisu iha komponente polísia Nasoins Unidas nian, asume responsabilidade vital sira iha manutensaun orden públika, aplikasaun lei provizóriu, no apoiu ba dezenvolvimentu no fortalesimentu Polísia Nasionál Timor-Leste nian. Sarjentu-Xefe Britten hanesan ponte moris ida entre ita-nia nasaun rua ne’e,” Prezidente Ramos-Horta subliña.
Sarjentu-Xefe Britten nia vizita mai Timor-Leste reflete ninia respeitu maka’as ba nasaun, ninia povu, no relasaun ne’ebé dura entre Timor-Leste no Austrália.
Nia serbisu ona iha Timor-Leste iha misaun manutensaun pás nian, no sente onradu atu fila hikas mai Dili no hetan oportunidade atu hasoru malu ho reprezentante sira Timor-Leste nian, inklui Prezidente.
Durante nia servisu tomak, Sarjentu-Xefe Britten sai nafatin defensór forte ba korajen, amizade, no kooperasaun entre komunidade sira iha rejiaun laran tomak.
Prezidente no povu Timor-Leste hato’o sira-nia agradesimentu kle’an ba Sarjentu-Xefe Britten no reafirma kompromisu Timor-Leste nian atu fortalese relasaun bilaterál no kooperasaun internasionál hodi buka pás, estabilidade, no dezenvolvimentu.
TATOLI
