Tempu badak sei hahú konstrusaun irrigasaun Lafaek Hasan iha Suku Bibileo
VIKEKE, 21 Agostu 2026 (TATOLI)—Xefe Suku Bibileo, Postu Vikeke Vila, Munisípiu Vikeke, Moises A. D. C. Pinto, informa projetu Programa Integradu Dezenvolvimentu Munisipál ba tinan 2026 kona-ba konstrusaun irrigasaun Lafaek Hasan iha Suku Bibileo, tempu badak sei hahú implementasaun.
“Kona-ba konstrusaun irrigaasaun Lafaek Hasan iha Suku Bibileo empreza halo ona mobilizasaun materiál. Empreza hein halo kontratu ho badaen sira hodi halo servisu konstrui irrigasuan,” Moises A. D. C. Pinto ba TATOLI iha Postu Vikeke Vila, Sesta ne’e.
Autoridade Suku Bibileo ne’e haktuir durante ne’e bee liga ba natar Lafaek Hasan kuantidade ne’ebé difikulta tebes ba agrikultór sira, entaun ho konstrusaun irrigasaun foun ida-ne’e bele fasilita agrikultór sira hasa’e produsaun hare.
“Natar ne’ebé lokaliza iha Lafaek Hasan ativu hamutuk ektare 30, maibé kuandu irrigasaun ne’e hotu iha tinan 2027, ha’u sente natar foun sei aumenta to’o ektare 100 tanba agora daudaun ita-nia agrikultór sira komesa lere mós sira-nia toos sira, atu kontrusaun irrigasuan konklui bele fornese bee ba natar foun sira,” nia subliña.
Moises informa irrigasaun ne’ebé liga bá natar purvolta metru 100, konstrusaun ba akaptasaun bee iha parte bee-matan ho medida metru 400×80.
Konstrusaun irrigasaun Lafaek Hasan bainhira konkluidu sei benefísia populasaun Suku Bibileo uma-kain 60-resin ho totál populasaun hamutuk na’in-189.
Projetu konstrusaun irrigasaun ne’e liuhusi konkursu públiku, implementa husi empreza Uauluvis Unip, Lda, ho númeru kontratu 2636/AMV/VII2026, konstrusaun hahú fulan-Jullu 2026 no sei ramata iha fulan-Janeiru 2027 ho totál orsamentu $36.306,49.
Jornalista: Vitorino Lopes da Costa
Editór: Xisto Freitas da Piedade
