Uma-Kain 300 iha Madohi simu ona notifikasaun atu hamamuk fatin
DÍLI, 21 Agostu 2026 (TATOLI) – Xefe Suku Madohi, Bernandino de Cristo Ferreira, informa katak uma kain hamutuk 300 iha Área Jupiter no Futu, Aldeia Rosario, Suku Madohi, Postu Administrativu Dom Aleixo, Munisípiu Díli, simu ona notifikasaun husi Governu liuhusi Sekretaria Estadu Asuntu Toponímia no Organizasaun Urbana (SEATOU) atu hamamuk fatin.
“Hau nia komunidade hamutuk uma kain 300 ne’ebé hela iha Área Jupiter no Futu, Aldeia Rosario, iha inísiu Agostu ne’e simu ona notifikasaun husi SEATOU. Iha notifikasaun laran hateten katak sira tenke hamamuk fatin iha loron 90, hahu hosi Setembru to’o Novembru nia rohan, molok Governu halo despezu administrativu ba sira,” Bernandino hateten ba TATOLI iha Sede Suku Madohi, Beto Timor, Dili, ohin.
Nia hateten katak, nu’udar autoridade lokál, nia parte informa ona ba komunidade kona-ba notifikasaun ne’e.
Komunidade agora hein prosesu levantamentu dadus atu fasilita prosesu pagamentu indemnizasaun.
Bernandino hateten katak objetivu hosi despezu administrativu ne’e mak atu fó espasu ba Governu hodi alarga estrada hosi área Hotel Futu to’o Akademia Polísia Comoro.
Tanba ne’e, nia husu ba komunidade atu kolabora ho Governu hodi fasilita prosesu no apoia dezenvolvimentu infrastruktura.
“Nu’udar autoridade lokál, ami prontu kolabora ho Governu hodi aselera dezenvolvimentu iha Timor-Leste,” nia dehan.
Tuir Xefe Suku Madohi, notifikasaun ne’e mós sai nu’udar medida ida husi Governu atu organiza no hadi’a planeamentu urbana.
Nia hateten katak uma kain sira ne’ebé simu notifikasaun sei hetan orientasaun tan kona-ba prosedimentu no dokumentasaun ne’ebé presiza atu submete ba autoridade kompetente.
“Governu mós husu kolaborasaun husi komunidade atu prosesu ne’e bele lao ho di’ak no tuir lei no regulamentu ne’ebé vigora,” nia konklui.
Iha biban ne’e, Suku Madohi liuhusi autoridade lokál apela ba sidadaun sira atu kontinua koordena ho lideransa lokál no autoridade relevante sira, atu informasaun kona-ba prosesu ne’e bele klaru no evita interpretasaun sala.
Enkuantu, reprezentante uma kain 300 iha Aldeia Rosario, Alberto Guterres, hateten katak komunidade prontu kolabora ho autoridade lokál no Governu atu hamamuk fatin ne’ebé sei uza ba alargamentu estrada.
“Ami rekoñese katak rai ne’e Estadu nian, maibé uma ne’ebé ami hela ba, Governu tenke selu, tanba uma ne’ebé ami harii ho ami nia osan rasik. Tanba ne’e, bainhira selu ona indemnizasaun, ami prontu sai,” Alberto dehan.
Nia fó hanoin hikas katak iha inísiu fulan Agostu, Xefe Suku Madohi hamutuk ho ekipa konjunta hosi SEATOU fó ona notifikasaun ba uma-kain sira no informa katak prosesu hamamuk fatin sei hahu hosi Setembru to’o Novembru 2026.
Jornalista: Camilio de Sousa
Editór: Filomeno Martins
