Xanana relata KM kria Komisaun Institusionál kombate Scam Call Center ba Ramos-Horta
DILI, 21 Agostu 2026 (TATOLI)–Primeiru-Ministru, Kay Rala Xanana Gusmão, sesta ne’e, hala’o enkontru ho Prezidente Repúblika, José Ramos-Horta, hodi relata kona-ba desizaun Konsellu Ministru ne’ebé kria ona komisaun institusionál ida atu haree ka kombate ba problema sibernétika no Scam Call Centre.
“Ha’u informa ba Prezidente Repúblika katak iha Konsellu Ministru semana kotuk, ami kria ona komisaun ida institusionál atu haree ba problema sibernétika, Scam Call Centre no buat sira ne’e hotu,” dehan Xanana ba jornalista sira hafoin hala’o enkontru ho Xefe Estadu iha Palásiu Prezidensiál Nicolau Lobato, Bairru Pite, ohin.
Xefe Governu ne’e hateten, Governu sei kontinua serbisu maka’as atu kombate krime sibernétiku iha Timor-Leste.
“Buat ne’e sei mai barak liután. Ami buka daudauk atu hatudu ba sira katak buat ne’e labele akontese iha ne’e, liuliu uza osan ba li’ur. Maibé ita labele sai fali paraízu ida ba buat ne’e,” Xanana hateten.
Nune’e mós, Primeiru-Ministru esplika katak Governu simu agradese husi Embaixada Repúblika Populár Xina no Embaixada Reinu Kambodia.
“Embaixada Xina mós agradese. Embaixada Kambodia buat sira-ne’e hotu, sira agradese atensaun boot ida-ne’ebé ita tau ba iha problema ida-ne’e,” nia dehan.
Problema Scam Call Center sai preokupasaun rejionál, tanba rede kriminál sira uza Timor-Leste hanesan fatin tranzitu hodi engaña sidadaun sira husi nasaun seluk.
Jornalista : Hortêncio Sanchez
Editór : Cancio Ximenes
