Iraun muda doutrina militár hosi defensiva ba ofensiva
DILI, 22 Agostu 2026 (TATOLI) – Iraun muda ona nia doutrina militár hosi postura defensiva ida ba ofensiva ida hafoin konflitu sira foin lalais ne’e ho Estadus Unidus no Izraél, hatete hosi porta-vós hosi Ezérsitu Iraun nian, brigadeiru-jenerál Mohammad Akraminia.
“Antes ne’e, doutrina militár ami-ninia país nian hanesan defensivu, maibé durante funu rua ne’e (ho EUA no Izraél), ami asisti mudansa ida iha doutrina militár hosi defensivu ba ofensivu”, tenik Akraminia, sita hosi ajénsia notisioza IRNA, iha sábadu ne’e.
Tuir nia, doutrina ofensivu foun ne’e la’ós de’it abranje operasaun preventiva sira maibé mós resposta imediata sira, ho eskala boot ba kualkér agresaun ne’ebé komete hosi inimigu.
Iha kalan 18 Juñu, Teeraun no Washington asina memorandu entendimentu ida hodi hakotu konflitu ne’ebé hahú ona iha 28 Fevereiru.
Maibé, iha loron 8 fulan-Jullu, Prezidente Estadus Unidus nian, Donald Trump, deklara katak sesarfogu la iha ona efeitu. Entaun, forsa sira Estadus Unidus nian lansa atake oioin hasoru Iraun.
Komandu Sentrál Estadus Unidus nian (CENTCOM) hatete katak atake sira ne’e hala’o hodi hatán ba asaun iranianu sira hasoru ró komersiál sira ne’ebé atravesa Estreitu Ormuz nian.
Tuir mai Iraun halo retaliasaun hodi ataka baze sira Estadus Unidus nian iha Médiu Oriente.
Iha loron 12 fulan-Jullu, Iraun fó-sai taka Estreitu Ormuz nian to’o Estadus Unidus hapara nia intervensaun iha rejiaun ne’e.
Loron ida liutiha, Trump hatete katak EUA sei sai hanesan “guardia” ba Estreitu Ormuz nian no sei halo fali blokeiu ida ba portu iranianu sira.
Iha Kinta-feira, Trump hatete katak Teeraun estraga ona oportunidade hodi hetan akordu ida ho Washington, hodi dudu EUA atu lansa operasaun ekonómika ida ho eskala boot hasoru Repúblika Izlámika.
Entretantu, Ministru Negósiu Estranjeiru Iraun nian, Abbas Araghchi, deskreve operasaun ne’e hanesan tentativa ida atu desvia atensaun hosi krize sira ne’ebé maka EUA rasik hasoru, hodi afirma katak ida-ne’e sei lori Washington ba derrota ida ne’ebé maka’as liután.
Notísia relevante: Xefe Tezouru EUA promete “sansaun sira ne’ebé maka’as liu iha istória” hasoru Iraun
Fonte sira: Sputnik/Antara
