Komunidade Kampung Alor husu BTL instala kanalizasaun bee-moos ba uma-kain hotu
DÍLI, 22 Agostu 2026 (TATOLI) – Xefe Suku Kampung Alor, Estela Aleixo, lori pedidu komunidade ba Governu, liuhusi Bee Timor-Leste (BTL, E.P.), atu instala sistema distribuisaun bee-moos ba uma-kain hotu iha Suku Kampung Alor, Postu Administrativu Dom Aleixo, Munisípiu Dili.
Estela hateten katak to’o agora, uma-kain barak iha suku ne’e seidauk asesu ba bee-moos liuhusi kanalizasaun BTL, E.P., ne’ebé hamosu difikuldade ba família sira atu hetan bee ba nesesidade lorloron.
“Komunidade husu BTL, E.P. atu instala bee-moos ba uma-kain hotu iha Suku Kampung Alor hodi garante asesu ba bee-moos no evita dada bee ilegal, ne’ebé bele hamosu konsekuénsia oioin,” Estela hateten ba TATOLI.
Nia hateten katak Suku Kampung Alor iha uma-kain liu 700 ho populasaun liu ema 3,000. Maibé, to’o agora, uma-kain 30 resin de’it mak asesu ona ba bee-moos liuhusi rede distribuisaun BTL, E.P.
Estela hateten katak uma-kain sira ne’ebé seidauk hetan ligasaun bee kontinua husu BTL, E.P. atu halo instalasaun ba sira-nia uma tanba komunidade prontu atu selu.
“Uma-kain sira barak seidauk asesu ba bee-moos liuhusi kanalizasaun BTL, E.P. Tanba ne’e, sira husu nafatin atu BTL mai instala bee-moos ba sira-nia uma, hodi evita dada bee ilegal,” nia dehan.
Tuir Estela, menus infraestrutura distribuisaun bee-moos halo komunidade balun dala barak tenta dada bee ilegal husi liña distribuidora atu responde ba nesesidade doméstika.
Nia hateten katak prátika ne’e bele hamosu risku ba seguransa no mós estraga infraestrutura rede distribuisaun bee nian.
Nia salienta katak disponibilidade bee-moos ba família sira bele ajuda hadi’a saúde públika, hametin kondisaun moris komunidade nian no garante utilizasaun bee ho maneira legál no responsável.
Enkuantu, reprezentante komunidade Kampung Alor, Virgilio Marques, hateten katak asesu ba bee-moos sai nafatin dezafiu ba uma-kain sira ne’ebé seidauk iha ligasaun husi BTL, E.P.
Nia hateten katak família sira ne’ebé laiha ligasaun bee dala barak tenke buka bee iha uma viziñu ka ba torneiru públiku ne’ebé fasilita husi Agência Kooperasaun Internasionál Japaun (JICA) besik Ministériu Finansa.
Tanba ne’e, nia husu BTL, E.P. atu aumenta instalasaun kanalizasaun bee-moos ba uma-kain sira iha Kampung Alor.
“Importante mak bee bele sulin to’o iha ami-nia uma atu uza ba nesesidade lorloron. Ami prontu atu selu, maibé presiza bee mai iha uma,” nia dehan.
Komunidade Kampung Alor hein katak BTL, E.P. bele halo levantamentu no implementa projetu instalasaun bee-moos iha área sira ne’ebé seidauk hetan atendimentu, atu garante komunidade hotu-hotu bele asesu ba bee-moos ho fasil no seguru.
Jornalista: Camilio de Sousa
Editór: Filomeno Martins
