Xefe Suku: Joven Kampung Alor hakribi ona violénsia no fó apoiu ba paz no dezenvolvimentu
DÍLI, 22 Agostu 2026 (TATOLI) – Xefe Suku Kampung Alor, Estela Aleixo, hateten katak joven sira iha Suku Kampung Alor, Postu Administrativu Dom Aleixo, Munisípiu Dili, komesa hadook-an ona husi konflitu no violénsia hodi kontribui ba estabilidade no dezenvolvimentu.
Nia hateten katak mudansa ne’e hahú nota desde 2024, bainhira joven sira komesa komprende katak dame no estabilidade importante atu fó espasu ba Governu hodi kontinua hala’o dezenvolvimentu nasionál.
“Desde 2024 to’o agora, joven sira la iha ona problema boot no komesa hakribi violénsia iha ami nia suku. Objetivu mak atu fó espasu ba Governu hodi hala’o dezenvolvimentu nasionál,” Estela Aleixo hateten ba TATOLI iha Sede Suku Kampung Alor, Dili.
Nia esplika katak konsellu suku halo aproximasaun regulár ho joven sira hodi fó orientasaun, motivasaun no apoiu atu evita konflitu. Koordenasaun ho autoridade lokal no Polísia Komunitária mós kontinua atu prevene no responde ba problema sira iha komunidade.
Estela hateten, bainhira problema ruma mosu, tantu iha kalan ka loron, lideransa suku hamutuk ho parte relevante sira buka atu responde lalais no foti medida apropriada hodi rezolve problema.
Tuir nia, Suku Kampung Alor mós kada fulan hato’o relatóriu kona-ba rejistu problema iha área suku ba Ministériu Seguransa no Defeza.
“Tanba ne’e, problema iha suku ne’e menus tebes no liña koordenasaun ho Ofisiál Polísia Suku (OPS) mós la’o di’ak tebes,” nia dehan.
Nia mós hateten katak joven sira fó konfiansa ba lideransa suku, inklui xefe aldeia sira, no komesa hili atividade pozitivu, hanesan jogu futeból, duke envolve an iha konflitu.
Enkuantu, membru komunidade, Virgilio Marques, hateten katak komunidade iha Suku Kampung Alor moris hamutuk iha unidade no dame.
“Ami nia suku livre husi konflitu, no joven sira mós kontribui ba paz no estabilidade,” nia dehan.
Maski nune’e, nia husu ba komunidade hotu, liuliu joven sira, atu kontinua mantein paz, estabilidade no unidade iha suku.
Representante juventude Suku Kampung Alor, Edmundu Ximenes de Sá, mós hateten katak tempu agora mak tempu atu buka oportunidade ba moris, la’ós atu kontinua halo konflitu entre joven sira, tantu iha bairru laran ka ho bairru seluk.
“Juventude iha Suku Kampung Alor la’ós hanesan uluk. Dadaun ne’e sira komesa iha konsiénsia atu foka ba eskola, tuir kursu lian Inglés, Koreanu, Japaun, komputadór no dezenvolve abilidade sira seluk,” nia dehan.
Nia hateten katak atividade desportiva, liuliu futeból, sai mós meiu ida ba joven sira atu hametin amizade no prepara an ba futuru.
“Agora tempu mak atu buka moris no prepara futuru, duke halo problema no konflitu ne’ebé la lori benefísiu ida,” nia konklui.
Suku Kampung Alor kompostu hosi aldeia tolu, mak Aldeia 01 Rai Lakan, Aldeia 02 Salamão no Aldeia 03 Anin Fuik, ho populasaun hamutuk liu ema 3,000.
Jornalista: Camilio de Sousa
Editór: Filomeno Martins
