Komisaun C prepara semináriu atu rona opiniaun públika kona-ba Lei IVA
DILI, 24 Agostu 2026 (TATOLI) – Komisaun C ne’ebé trata Asuntu Finansa Públika marka ona data iha 18 Setembru 2026 atu realiza semináriu nasionál hodi rona opiniaun públika kona-ba esbozu Lei Impostu sobre Valór Akrexentadu (IVA).
Prezidente Komisaun C, Cedelízia Faria dos Santos, hatete daudaun halo hela koordenasaun ho Ministériu Finansa atu trata lei ne’e sai hanesan prioridade, maibé presiza rona mós entidade relevante sira husi parte Governu, setór privadu, sosiedade sívil sira-nia hanoin, tanba bainhira iha implementasaun sei fó impaktu ba taxa sira.
“Implementa mak arte pozitivu bele hatama reseita, [maibé] labele aplika hotu kedas ba nesesidade bázika balun, tanba ida-ne’e fó impaktu direta ba povu ki’ik nia moris”, nia hateten iha Parlamentu Nasionál, ohin.
Deputada konsidera lei ne’e nia importánsia tanba país agora sai ona membru Asosiasaun Nasaun Sudeste Aziátiku (ASEAN, sigla inglés).
Antes ne’e, Ministra Finansa, Santina Cardoso, dehan sei halo diseminasaun ba ezbosu Lei IVA hodi rona opiniaun públika molok lori bá Konsellu Ministru atu hetan aprovasaun no depois halo submisaun ba Parlamentu Nasionál.
Tuir nia, objetivu husi diseminasaun ne’e mak atu asegura katak ema hothotu komprende didi’ak konteúdu lei nian no impaktu ne’ebé bele mosu bainhira implementa.
“Lei IVA ne’e la’ós Governu de’it mak prepara. Ita-nia tax paid ne’ebé ikus lei ne’e sei afeta ba sira [nune’e], sira mós tenke iha mekanizmu sistema ida ba implementa”, nia dehan.
Governu kontinua prepara Autoridade Tributária no Aduaneira atu administra Lei IVA iha tinan 2027 hanesan parte ida prinsipál ba mobilizasaun reseita doméstika ne’ebé espera atu kontribui 1,5% husi Produtu Internu Brutu (PIB).
Notísia relevante: http://MF sei halo diseminasaun ba ezbosu Lei IVA antes submete ba Parlamentu –
Jornalista: Nelson de Sousa
Editora: Maria Auxiliadora
