Komisaun Permanente la realiza plenária tanba laiha ajenda durante resesu
DILI, 24 Agostu 2026 (TATOLI) – Durante fulan ida-resin iha tempu resesu nian, Komisaun Permanente Parlamentu Nasionál la hala’o reuniaun plenária tanba laiha ajenda atu diskute.
Segundu Vise-Prezidente Parlamentu Nasionál, Duarte Nunes, informa katak, tuir regra durante resesu, bainhira iha ajenda mak halo diskusaun. “Se la’e, ita bolu deputadu sira husi férias mai, más ajenda laiha, ita atu halo oinsá”, nia hatete iha Parlamentu, ohin.
Deputadu ne’e salienta katak maski nune’e funsionamentu normál iha Parlamentu nafatin no konta ho Komisaun Permanente atu trata ajenda urjente ruma.
Nia informa katak iha duni pedidu ida atu halo votu pezár ba falesimentu antigu deputadu husi bankada Frente Revolusionáriu Timor-Leste Independente (FRETILIN), Manuel Gaspar, maibé ho kestaun balun la konsege realiza hodi adia ba tempu seluk.
Lembra katak, iha 15 Jullu, Parlamentu liuhusi reuniaun plenária Komisaun Permanente dahuluk deside katak durante períodu resesu sei hala’o reuniaun semana rua dala ida, ne’ebé sei realiza iha kada kinta-feira.
Desizaun ida-ne’e halo atu fó fleksibilidade ba deputadu sira durante resesu hala’o atividade polítika iha baze ne’ebé hetan impedimentu, halo estudu komparativu sira no tratamentu saúde.
Membru Komisaun Permanente kompostu husi deputadu na’in-26 hodi hala’o knaar durante resesu fulan rua, ne’ebé mai husi bankada CNRT na’in-12, Partidu Demokrátiku rua, FRETILIN ualu, KHUNTO rua no PLP rua, ne’ebé hala’o knaar hodi garante funsionamentu parlamentár iha tempu resesu nia laran.
Períodu resesu Parlamentu Nasionál komesa iha 15 Jullu no sei tama fali iha 15 Setembru 2026, ne’ebé sei hahú ho sesaun solene.
Notísia relevante: http://Parlamentu hala’o plenária semana rua dala ida durante resesu –
Jornalista: Nelson de Sousa
Editora: Maria Auxiliadora
