“TL tenke evolui husi konsumidor koñesimentu ba kriadór”
DILI, 24 Agostu 2026 (TATOLI)—Prezidente Repúblika, José Ramos-Horta, hateten Timor-Leste tenke evolui husi konsumidór koñesimentu hodi garante dezenvolvimentu ne’ebé dura.
“Timor-Leste tenke evolui husi konsumidor koñesimentu ba kriadór, tau hamutuk siénsia ho enjeñu lokál hodi harii kultura nasionál ida iha-ne’ebé koñesimentu sai nu’udar fundasaun ba dezenvolvimentu ne’ebé dura,” Prezidente Repúblika, José Ramos-Horta, hateten kestaun ne’e iha abertura simeira siénsia ba dezenvolvimentu 2026 ne’ebé hala’o iha Sentru Konvensaun Dili (CCD), ohin.
Tanba ne’e, Xefe Estadu dehan, aleinde simeira siénsia ba dezenvolvimentu 2026, halo parte iha série eventu nasionál estratéjiku sira iha Agostu 2026 ne’ebé dezeña atu eleva Timor-Leste nia perfíl internasionál no avansa dezenvolvimentu sustentável liuhusi edukasaun, diplomásia no kooperasaun internasionál.
“Hodi liga koñesimentu globál ho esperiénsia lokál, eventu ne’e refleta Timor-Leste nia opsaun deliberada atu koloka nasaun joven, reziliente ida iha sentru diálogu sientífiku global,” nia hateten.
Nia hatutan, ida-ne’e maka demonstrasaun maka’as ida husi ambisaun nasaun nian atu transforma nia-an husi konsumidór koñesimentu ba produtór koñesimentu, ho siénsia no inovasaun ne’ebé sai hanesan pilár fundamentál ba dezenvolvimentu iha futuru.
Jornalista : Alexandra da Costa
Editór : Cancio Ximenes
