UNICEF entrega motorizada ualu ba MSSI 

DILI, 24 Agostu 2026 (TATOLI)—Fundu Nasaun Unida ba Labarik (UNICEF-sigla ingleza) hamutuk Embaixada Austrália iha Timor-Leste apoia motorizada ualu (8) ba Ministériu Solidariedade Sosiál no Inkluzaun (MSSI) hodi haforsa kapasidade ofisiál protesaun labarik.

“Motorizada neʼebé UNICEF entrega ohin sei ajuda MSSI atu aumenta mobilidade no fasilita tékniku sosiál sira atu halo vizita ba komunidade, monitoriza kazu, halo identifikasaun no asesmentu, halo akompañamentu ba família no labarik sira, no fó resposta ba nesesidade sosiál iha territóriu Timor-Leste. Motorizada hirak-ne’e sai hanesan instrumentu atu lori servisu protesaun sosiál besik liután ba komunidade tuir programa Governu nian,” Ministra Solidariedade Sosiál no Inkluzaun, Verónica das Dores dehan ba jornalista sira iha MSSI, Segunda ne’e.

Nune’e, biban ne’e Verónica hakarak fó mensajen espesiál katak sira-neʼebé sei uza motorizada sira-ne’e iha servisu loroloron, sei lori naran no responsabilidade MSSI nian. Uza no kuidadu didi’ak motorizada ida-ne’e ho dixipina no responsabilidade, uza ba interese protesaun sosiál nian, la’ós ba interese pesoál.

“Iha komunidade nia leet, imi-nia atitude, imi-nia maneira ko’ alia, imi-nia maneira atende família no labarik sira, hotu-hotu sei reprezenta MSSI. Tanba ne’e, ha’u husu ba tékniku sosiál sira atu servisu ho profisionalizmu, empatia, respeitu no integridade,” nia dehan.

Ministra Verónica fó hanoin ba ekipa téknika atu hasoru família ida-ne’ebé iha difikuldade, rona sira, bainhira hasoru labarik ida neʼebé vulnerável, trata nia ho dignidade no sensibilidade. Labarik idaidak iha direitu atu moris ho seguransa, dignidade, kuidadu no oportunidade atu dezenvolve nia an. MSSI hanesan servisu sosiál, iha responsabilidade atu ajuda, asegura direitu hirak-ne’e. Ida-ne’e mak espíritu servisu sosiál nian. Tanba objetivu komún atu garante katak labarik Timor-Leste bele moris iha ambiente ne’ebé seguru, saudável no protejidu.

“Maibé, atu atinje objetivu ida-ne’e, Governu liuhusi MSSI no UNICEF labele servisu mesak. Presiza kooperasaun ho munisípiu, autoridade lokál, lideransa komunitária, família, eskola, servisu saúde, sosiedade sivíl no parseiru sira seluk,” Verónica informa.

MSSI kontinua hametin kooperasaun ho UNICEF no parseiru sira hotu hodi dezenvolve sistema protesaun sosiál ne’ebé besik liután ba komunidade, responsivu liután no inkluzivu liután.

Iha parte seluk, Reprezentante UNICEF iha Timor-Leste, Patrizia DiGiovanni, hateten liuhusi entrega motorizada mak kontinua hametin ofisiál protesaun labarik liliu komunidade ne’ebé dook.

“Ohin loron, ita la’ós entrega de’it veíkulu sira. Ami hametin ofisiál protesaun labarik sira-nian abilidade atu alkansa labarik no família sira-ne’ebé presiza apoiu, liuliu iha komunidade ne’ebé dook. Ofisiál sira sei alkansa labarik sira lalais liu, hala’o vizita akompañamentu ho efisiente liu, no hametin servisu jestaun kazu nian, partikularmente iha komunidade ne’ebé dook,” Patrizia tenik.

Patrizia DiGiovanni hatutan entrega ida-ne’e tenke haree hanesan pontu partida, la’ós pontu finál. Nune’e, UNICEF enkoraja MSSI atu kontinua investe iha mobilidade no efikásia forsa traballu servisu sosiál nian liuhosi habelar apoiu ne’e ba Ofisiál Protesaun Labarik sira iha munisípiu hotu-hotu no garante katak rekursu operasionál adekuadu, inklui kombustivel no manutensaun, disponivel.

“Ohin ita entrega motor sira-ne’e, ha’u enkoraja ita hotu atu haree sira la’ós de’it hanesan rikusoin, maibé hanesan ferramenta ba asaun no impaktu. Kilómetru idaidak ne’ebé hala’o tenke ajuda asegura katak labarik ida iha risku hetan identifikasaun lalais liu, família ida hetan apoiu lalais liu, no komunidade ida sai seguru liu ba labarik sira,” nia esklarese.

Aleinde ne’e, Embaixadór Austrália Interinu iha Timor-Leste, Edward Wilkinson, afirma katak kontinua hametin kompromisu hamutuk hodi hametin sistema protesaun labarik iha Timor-Leste.

Tinan ida-ne’e, Austrália sente orgullu tanba avansa ona, no apoiu ba protesaun labarik, ho millaun $1,2 iha finansiamentu foun hodi investe iha sistema nasionál neʼebé forte liu, no apoia Timor-Leste nia lideransa no kapasidade rasik atu proteje labarik sira agora no ba futuru.

“Ami apresia Ministra nia lideransa no ninia Ministériu nia serbisu iha progresu reforma importante sira protesaun labarik nian, inklui hametin mekanizmu sira ba kuidadu alternativu no protesaun labarik online, no harii kapasidade forsa traballu servisu sosiál nian, ba benefísiu labarik sira iha nasaun tomak. Ami mós rekoñese UNICEF nia papėl esensiál no tempu naruk hodi apoia Governu no sosiedade sivíl hodi koordena no responde prioridade nasionál,” nia dehan.

Seremonia entrega ohin ba motor ualu maka investimentu prátiku ida-ne’ebé sei ajuda Ofisiál Protesaun Labarik sira atu to’o iha komunidade ho efisiente liu, atende kazu labank sira ho efetivu liu no fo apoiu iha ne’ebé presiza liu. Sistema salvaguarda sira tenke funsiona ba labarik hotu-hotu, liuliu sira ne’ebé hasoru risku boot liu, inklui labarik-feto sira, labarik sira ho defisiensia, no labarik sira ne’ebé hela iha kuidadu rezidensiál.

Austrália espera katak labarik idaidak merese atu moris livre husi violénsia, abuzu, abandona no esplorasaun. Garante katak labarik sira seguru no bele buras liu maka fundamentál atu harii jerasaun líder sira tuirmai no Timor-Leste ida-neʼebé saudavel, prósperu no reziliente.

“Ha’u hakarak agradese ba Ministériu Solidariedade Sosiál no Inkluzaun, UNICEF Timor-Leste, no parseiru sira hotu ne’ebé servisu atu apoia sistema protesaun labarik neʼebé inkluzivu, responsivu, no sustentável. Ita-nia hamutuk nu’udár esforsu ida hodi hametin família sira no komunidade no harii futuru ida-ne’ebé seguru liu ba labarik idaidak,” nia agradese.

 Jornalista: Osória Marques

Editór: Xisto Freitas da Piedade