Abitante Vikeke rihun-rua resin envolve iha kooperativa
VIKEKE, 25 Agostu 2026 (TATOLI)—Koordenadór Sekretáriu Estadu Kooperativa Munisípiu Vikeke, Albino da Costa Guterres, informa abitante iha Munisípiu Vikeke inisiativa envolve setór kooperativa sira-ne’ebé eziste iha Munisípiu Vikeke hamutuk 2.217.
“Kona-ba dadus husi 2025, ami rekolla kada kooperativa sira-ne’ebé komunidade iha Munisípiu Vikeke harii hamutuk 21. Husi kooperativa ne’e ita-nia komunidade hamutuk 2.217 envolvidu hodi rai osan,” Albino da Costa Guterres ba TATOLI iha Postu Vikeke Vila, Tersa ne’e.
Albino hatutan kooperativa sira-ne’ebé eziste parte SEKoop Munisípiu Vikeke sempre fó asisténsia hanesan oferese formasaun ba koopetiva hodi jere kooperativa.
“Kooperativa husi 21 ida-ne’e balun pasivu katak atividade ladún la’o ne’e iha kooperativa (6), ativu iha 15. Iha tinan 2026 koopetativa foun rua eziste kompostu husi Kooperativa Rohrek no Kooperativa PHF iha Postu Uatulari ne’ebé ami sei rekolla sira-nia dadus ba tinan 2026,” nia subliña.
Nia dehan, bá-oin, SEKoop kontinua fó asisténsia ba kooperativa sira-ne’ebé eziste iha Munisípiu Vikeke liuliu ba kapasitasaun, karik kooperativa sira husu apoiu ba formasaun SEKoop prontu ajuda para hasa’e koñesimentu kooperativa sira-nian.
“Bá-oin ita nafatin fó asisténsia ba ita-nia kooperativa sira-ne’ebé eziste iha Munisípiu Vikeke, atu kooperativa sira nafatin eziste. Ami kada fulan sempre ba haree kooperativa sira no rona sira preokupasaun sira, atu kooperativa sira atividade iha komunidade leet bele la’o bá-oin tanba kooperativa sai hanesan importante ba komunidade hodi rai sira-nia osan no impresta osan,” nia hato’o.
Tuir dadus, Kooperativa Primária husi SEKoop Munisípiu Vikeke 2025 kompostu husi Kooperativa OSGIMA totál membru na’in-92, kapitál $3.035,00, Kooperativa Builale, membru 202, kapitál $491.750,00.
Kooperativa HAFA, membru hamutuk na’in-41, kapitál $1.445,00, Kooperativu Kusu, membru na’in-55, kapitál laiha, Kooperativa Khasum, membru na’in-31, kapitál $5,045.00, Kooperativa HFF, membru na’in-38, kapitál $17.305,50, Kooperativa BFF, membru na’in-72, kapitál $21.546,98.
Kooperativa Ira-Luka, totál membru na’in-877, kapitál $243.988,95, CU LANAHAS, membru 57, kapitál $85,547,00, CU. CCTM, membru na’in 43, kapitál $11.520,00, CU. MARESBI, membru 83, kapitál 1.508.135,00, CU. HAMAIFOR, membru na’in-120, kapitál $34,988.00, Halibur Multisektoral membru na’in-168, laiha kapitál, CU. MARESBI, membru na’in-43, kapitál $228.500,00, CU. CARANA, membru na’in-40, kapitál $ 1.800,00, CU. CHAMAU, membru na’in-200, laiha kapitál CU BEFOMO, membru na’in-25, kapitál $2,500,00, CU. Sabiru Khamanek, membru na’in-30, kapitál $26.490,00.
Jornalista: Vitorino Lopes da Costa
Editór: Xisto Freitas da Piedade
