Fatin fa’an ikan iha Merkadu Manleuana utiliza ba fa’an produtu seluk
DÍLI, 25 Agostu 2026 (TATOLI) – Negosiante ikan sira iha Merkadu Manleuana hili atu fa’an ikan iha fatin seluk tanba fatin ne’ebé Governu prepara ba atividade fa’an ikan la fasilita asesu ba konsumidór.
Tuir observasaun TATOLI hatudu katak fatin fa’an ikan ne’ebé Governu, liuhusi Ministériu Komérsiu no Indústria (MCI), konstrui ona ba negosiante ikan sira la uza tuir nia objetivu, no negosiante sira uza hodi fa’an buat seluk, hanesan sapatu.
Negosiante sapatu, Luis Pinto, hateten katak sira uza fatin ne’e tanba durante tempu naruk fatin ne’e husik mamuk.
“Tanba fatin ne’e husik mamuk, ami aproveita hodi fa’an sapatu iha laran duké husik de’it. Bainhira negosiante ikan sira presiza uza fila fali fatin ne’e, ami prontu atu muda ba fatin seluk,” dehan Luis ba TATOLI iha Merkadu Manleuana, tersa-feira.
Nia hateten katak lokalizasaun fatin ne’e fasilita konsumidór sira atu asesu no sosa sapatu.
“Ami fa’an iha ne’e besik tinan tolu ona no hetan lukru natoon atu sustenta nesesidade família no selu oan sira nia eskola,” nia dehan.
Reprezentante negosiante ikan sira, Domingas da Costa, hateten katak fatin ne’ebé Governu prepara la apropriadu ba fa’an ikan tanba lokalizasaun ne’e iha klaran liu no nakonu ho negosiante roupa, obralan, moda no sapatu.
“Ami uluk fa’an iha fatin ne’ebé Governu prepara husi 2023 to’o 2024. Maibé durante tinan ida, ami la hetan konsumidór natoon tanba fatin ne’e iha klaran liu no taka husi negosiante sira seluk. Dala barak ikan la fa’an hotu no dodok,” dehan Domingas.
Nia hateten katak situasaun ne’e obriga negosiante ikan sira muda ba parte oin hodi fasilita asesu ba konsumidór no aumenta rendimentu atu sustenta família.
Jestor Merkadu Manleuana, Elias Barros, rekoñese katak fatin ne’ebé Governu prepara ba negosiante ikan la apropriadu tanba lokalizasaun ne’e iha klaran liu no difísil ba konsumidór sira atu asesu.
“Tanba ne’e, ami fó liberdade ba negosiante ikan sira atu fa’an iha liur, maibé tenke nafatin iha área merkadu nian. Sira mos tenke hamos fo’er no mantein disciplina, nune’e labele hadau malu fatin,” dehan Elias.
Elias informa katak Governu, liuhusi MCI, planeia konstrui fatin foun iha parte kotuk Merkadu Manleuana iha tinan oin.
Projetu ne’e sei inklui espasu komersiál ba atividade oioin, inklui área espesífika ba negosiante ikan sira.
“Ami hein katak merkadu foun ne’ebé Governu lansa fatuk dahuluk iha fulan Abril liubá bele akumula negosiante hotu-hotu atu hala’o atividade komersiál iha laran, inklui negosiante ikan sira,” nia konklui.
Jornalista: Camilio de Sousa
Editór: Filomeno Martins
