Korpu Bombeiru Baukau husu Governu rezolve orsamentu operasionál
BAUKAU, 25 Agostu 2026 (TATOLI)–Korpu Bombeiru Baukau husu Governu Sentrál responde orsamentu operasionál ne’ebé durante fulan-neen seidauk simu.
Portavóz Korpu Bombeiru Munisípiu Baukau, Casemiro de Oliveira das Neves, solisita Ministériu Interiór liuhusi Sekretaria Estadu Protesaun Sivíl atu haree no fiskaliza asuntu osan ransu ne’ebe promete seidauk to’o iha membru Korpu Bombeiru sira-nia liman atu utiliza ba nesesidade servisu nian iha terrenu.
“Ami Bombeiru Timor-Leste durante fulan-haat atu ba fulan lima ona osan ne’ebé ami atu hodi sustenta família uma laran nian tenke uza ka gasta filafali iha Korpu Bombeiru idaidak hodi atende servisu emerjénsia ne’ebé afeta ba komunidade,” Casemiro da Neves hateten iha edifísiu Bombeiru Vila Antiga, Baukau, Tersa ne’e.
Nia relata bazeia ba observasaun estrutura Autoridade Protesaun Sivíl (APC-sigla portugeza) Baukau laiha espíritu no vontade hodi trata ezijénsia referida ho lalais nune’e husu entidade kompetente atu prosesa no rezolve.
Iha fatin hanesan, Membru Korpu Bombeiru Munisípiu Baukau, José Francisco da Costa, hateten, osan ransu ne’ebé Sekretaria Estadu Protesaun Sivíl liuhusi APC aloka ba membru Korpu Bombeiru iha territóriu nasionál kada fulan $80 iha-ne’ebé antes ne’e promote sei selu iha fulan-Maiu maibé to’o fulan-Agostu, seidauk simu osan referidu.
“Ami sente ladún di’ak, liuliu Prezidente Autoridade ho nia estrutura tomak ne’e laiha espíritu no vontade atu rezolve ami-nia problema,” José hateten.
Bombeiru Baukau rasik antes ne’e hetan apoia hahán meiudia no kalan ne’ebé kontrata liuhusi Sekretaria Estadu Protesaun Sivíl no Autoridade Protesaun Sivíl maibé iha inísiu fulan-Maiu hapara ona ho razaun osan ransu sei aloka ba kada fulan ba membru Bombeiru sira.
“Agora osan ransu laiha. Kompañia te’in mos laiha. Ami idaidak tau osan hamutuk sosa foos no rice cooker hodi te’in iha-ne’e, hodi aumenta servisu oras 24 nia laran,” nia haktuir.
Entretantu, totál membru Korpu Bombeiru iha Munisípiu Baukau hamutuk na’in-26.
Jornalista: Natalino Belo
Editór: Xisto Freitas da Piedade
