KRP 2027, MSSI mantein programa 2026 ho orsamentu millaun $24
DILI, 25 Agostu 2026 (TATOLI)—Ministra Solidariedade Sosiál no Inkluzaun, Verónica das Dores, hateten iha aprezentasaun Komité Revizaun Polítika ne’e MSSI la aprezenta programa prioridade foun maibé sira mantein programa ne’ebé antes ne’e define ona iha 2026 ho orsamentu hamtuuk millaun $24.
“Ita hadi’a de’it mekanizmu sira liuliu liga ho dadus orsamenu, tanba MSSI iha instituisaun tutelada sira mak INSS, SNR, ne’ebé ko’alia kona-ba asuntu ema ho difisiénsia no asuntu sosiál. Entaun, oinsá mak atu hadi’a moris ema ho difisiénsia nian,” Ministra ne’e relata ba jornalista sira iha Ministériu Finansas, ohin.
Ministra ne dehan, entaun oinsá mak sira halo ajustamentu ba dadus ema ho defisiénsia, nune’e servisu ne’e tenke iha koordenasaun ho INSS, Estatístika, Ministériu Justisa MAE no autoridade lokál sira atu bele salvaguarda orsamenu balun ne’ebé identifika ba programa prioridade sira.
“Aleinde ne’e, ohin, ita ko’alia kona-ba longu prazu, médiu prazu, no kurtu prazu. Karik iha tinan 2027 ita presiza hadi’a mekanizmu servisu, entaun 2028 mós ita presiza hadi’a neineik to’o ajustamentu dadus ne’e loos,” nia dehan.
Enkuantu, nia dehan, kona-ba orsamentu nian ne’e MSSI la’ós aumenta ka diminui maibé mantein millaun $24 hanesan tinan kotuk.
“Agora oinsá mak ita halo jestaun internál para jere osan ida-ne’e, katak ita tenke aumenta servisu, nune’e osan ne’e bele fahe tuir programa prioridade ne’ebé ita identifika ona,” nia hateten.
Jornalista : Alexandra da Costa
Editór : Cancio Ximenes
