Kuaze metade joven Suku Bidau-Akadiruhun serbisu iha rai-li’ur
DÍLI, 25 Agostu 2026 (TATOLI) – Kuaze metade husi joven Suku Akaderhun, Postu Administrativu Nain Feto, Munisípiu Dili, dadaun ne’e serbisu iha rai-li’ur, liuliu iha Austrália, Koreia do Sul, Inglaterra, Irlanda no nasaun seluk.
Xefe Suku Akaderhun, Juvinal da Conceição, relata katak Suku Akadiruhun ne’ebé kompostu husi aldeia tolu – Aldeia Nuu Badak, Toko Baru no Akaderhun, iha populasaun 2,000-resin. Husi númeru ne’e, iha joven ho idade produtiva hamutuk 600, no na’in 285 mak serbisu ona iha estranjeiru.
“Husi joven na’in 600 ne’e, sira na’in 285 mak serbisu ona iha rai-liur, hanesan Austrália, Koreia do Sul, Inglaterra, Irlanda no nasaun seluk,” Juvinal ba TATOLI iha Sede Suku Bidau-Akadiruhun, Dili, ohin.
Juvenal apresia kontribuisaun joven sira ne’ebé serbisu iha rai-liur tanba sira-nia rendimentu bele ajuda família no kontribui ba diversifikasaun ekonomia família no nasaun.
Nia mós espera katak esperiénsia no abilidade ne’ebé joven sira hetan durante serbisu iha rai-li’ur bele mós aplika iha Timor-Leste hodi kontribui ba dezenvolvimentu nasionál.
Maske nune’e, Juvinal hateten katak númeru joven ne’ebé serbisu iha rai-li’ur mós sai dezafiu ba komunidade tanba númeru joven ne’ebé hela iha suku laran menus.
Nia dehan situasaun ne’e limita partisipasaun juventude iha atividade sosiál no dezenvolvimentu lokal.
“Tanba ne’e, Governu presiza kontinua kria oportunidade empregu iha rai laran. Joven sira ne’ebé fila husi rai-li’ur mós bele kontinua serbisu no investe iha sira-nia komunidade,” nia dehan.
Jornalista: Camilio de Sousa
Editór: Filomeno Martins
