MKAE atribui sertifikadu investimentu ba empreza lokál tolu

DILI, 25 Agostu 2026 (TATOLI)—Ministériu Koordenadór Asuntu Ekonómiku (MKAE) servisu hamutuk ho Trade lvest    atribui  deklarasaun  benifisiu  sertifikadu  investimentu ba Empreza lokál tolu hanesan Joint-Venture Murak Rai Timor (MRT, E.P), Prime Timor Enterprise, Lda, no Green Pzz, Lda, hodi halo investimentu iha Manatutu, Likisá no Kovalima.

​Vise Primeiru-Ministru no Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, apresia empreza Timor-oan sira-ne’ebé mak konsege halo sira-nia investimentu ho sira-nia kapitál rasik.

“Ami servisu hamutuk ho TradeInvest, realiza tan Empreza lokál tolu mak asina joint venture hanesan EMG-MRT halo investimentu iha Manatutu, empreza Green Pzz, Lda halo investimentu iha Liquiça no Prime Timor Enterprise, Lda halo investimentu pekuária ka haki’ak karau iha Kovalima. Tanba ne’e, ha’u  apresia  empreza Timoroan sira ne’ebé mak konsege halo sira-nia investimentu ho sira-nia modal rasik, ka kapitál rasik iha Munisipiu tolu,” Governante Francisco Kalbuadi Lay dehan ba jornalista sira bainhira ramat  entrega sertifikadu ba empreza tolu iha Gabinete MAKE, Faról, ohin.

Nia esplika, Empreza timoroan halo investimentu ida-ne’e di’ak iha futuru no kualidade ne’ebé mak di’ak iha Europa no iha fatin sira seluk.

​“Empreza Green Pzz, Lda halo investimentu iha Likisá hodi aselera no kontribui ba Timor-Leste nia adezaun ASEAN iha tinan 2029, nune’e dezenvolve iha setor ekonomia iha rai laran.

MKAE husu empreza tolu atensaun investimentu boot ba sira nu’udar setór privadu ne’e sai hanesan xave importante ba dezenvolvimentu ba sustentabilidade ba ekonomia futuru rai ida-ne’e nian.

Iha fatin hanesan, Diretór Ezekutivu TradeInvest Timor-Leste, Duilio Mariano G Araujo da Silva, hateten Empreza Green Pzz, Lda ho negósiu prinsipál hodi halo akomodasaun Otél, Resort,  Apartemen and villa ho valor investimentu orsamantu montante $4,766.250,00 no númeru traballadór timoroan atuál hamutuk ema na’in-25 no estranjeiru na’in-20.

Empreza Green Pzz, Lda halo investimentu ida-ne’e lokaliza iha aldeia Guico Kraik, Postu Administrativu Bazartete, Munisípiu Likisá,” Duilio Mariano esplika.

Nia haktuir, Z&Z Resort ida-ne’e sira halo investimentu iha otél no ohin sira mós hato’o katak sei responde ba uma-na’in ba ASEAN iha 2029. Ho esforsu tomak sira sei realiza hodi responde ba ida-ne’e.

“Ha’u  hanoin investimentu sira-ne’e ita hatene katak kontribui tebes  ba ita-nia ekonomia  no diversifika ekonomia atu ita labele depende ba setór petroleu,” nia afirma.

Empreza ne’e nia deskrisaun legalidade no planu investimentu husi empreza proponente ba empreza Green Pzz, Lda hatoo aplikasaun formál ida ba TradeInvest Timor-Leste iha 10 Abríl 2026. Ho pedidu atu hetan deklarasaun benefísiu (DoB) hodi bele asesu ba investivu fiskál no aduaneira tuir lei investimentu privadu nú. 1/2017.

Objetivu prinsipál no kompromisu husi empreza dezenvolve hela Palmy Z & Z Resort, kompleksu ospitalidade premium ida iha área tasi-ibun Lauhata, Likisá.

Maibé nvestimentu ne’e entegra fasilidade sira hanesan Otel Boutique ho kuartu 42, apartamentu unidade 20, Resort Estilu Cottage/kabana no gazebo hamutuk 10, Villa luxu hamutuk unidade 25, fasilidade seluk hanesan Piscina, Restaurante, Spa, Yoga Pavillion, Gym, Salaun Konferénsia, Salaun festa/kazamentu nian no asesu ba tasi-ibun.

Ho nune’e, Empreza Prime Timor Enterprise, Lda, halo atividade investimentu iha  setór Pekuária hanesan haki’ak karau no produsaun na’an-karau ho valór investimentu orsamantu $26.429.999,00 iha suku Beko, Postu Administrativu Suai Vila, Munisipiu Kovalima.

EMG-MRT Ilimanu, Lda, mak empreza konjunta ida entre Elegant Marble Group (investidór privadu) no Murak Rai Timor (MRT, E.P.), empreza públika Timor-Leste nian.

Maibé Empreza ne’e harii atu dezenvolve indústria mármore integradu foun iha Timor-Leste, foka ba esplorasaun, prosesamentu no fabrikasaun produtu mármore. Empreza nia operasaun prinsipál lokaliza iha Munisípiu Manatutu, Timor-Leste.

Tanba empreza EMG-MRT Ilimanu Lda foka ba esplorasaun, prosesamentu no fabrikasaun produtu mármore ho Kapitál investimentu $51.000.000,00.

Jornalista : Felicidade Ximenes

Editór        : Cancio Ximenes