Negosiante ai-funan husu Governu prepara fatin apropriadu iha Merkadu Manleuana
DÍLI, 25 Agostu 2026 (TATOLI) – Negosiante ai-funan iha Merkadu Manleuana, Anabela de Jesus, husu Governu atu prepara fatin ne’ebé di’ak no seguru, atu sira bele kontinua hala’o atividade komersiál no sustenta família.
Reprezentante negosiante ai-funan, Anabela hateten katak negosiante ai-funan 30-resin, ne’ebé maioria mai husi Dare, enfrenta difikuldade tanba fatin ne’ebé sira uza agora la apropriadu no difísil ba konsumidór sira atu asesu.
“Ami husu Governu atu prepara fatin ne’ebé di’ak, atu ami bele fa’an ami-nia produtu ho seguru no hetan rendimentu ba sustenta família loro-loron,” Anabela hateten ba TATOLI iha Merkadu Manleuana, ohin.
Nia hateten katak rendimentu husi fa’an ai-funan agora menus kompara ho tempu uluk.
Nia esplika katak iha tempu di’ak, negosiante sira bele hetan rendimentu entre US$10 no US$50 iha loron ida. Maibé, dala ruma sira la hetan rendimentu tanba negosiante roupa obralan sira taka área ne’ebé sira uza.
“Dadaun ne’e, ami difísil atu hetan konsumidór tanba negosiante roupa obralan sira taka área tomak no la iha espasu natoon ba ami atu fa’an ai-funan. Ami husu Governu atu fasilita ami buka fatin seluk ne’ebé seguru, ka organiza negosiante roupa obralan sira ba laran, hodi fó espasu konsumidor sira atu asesu mai ami-nia produtu,” nia dehan.
Entretantu, Jestor Merkadu Manleuana, Elias Barros, rekoñese katak fatin ne’ebé negosiante ai-funan sira uza agora la apropriadu tanba área ne’e taka husi negosiante roupa obralan sira.
Nia hateten katak situasaun ne’e difísil ba konsumidór sira atu asesu ba negosiante ai-funan.
“Parte jestaun merkadu nafatin husu sira atu aguenta no hein merkadu foun, ne’ebé sei permite sira hala’o atividade ho seguru,” dehan Elias.
Nia informa katak Governu, liuhusi Ministériu Komérsiu no Indústria (MCI), planeia konstrui fatin foun iha Merkadu Manleuana nia kotuk.
Projetu ne’e sei integra espasu komersiál ba atividade oioin, inklui área espesífika ba negosiante sira.
“Ami hein merkadu foun ne’ebé Governu lansa fatuk dahuluk iha fulan Abril liubá bele akomoda negosiante hotu-hotu atu hala’o atividade komersiál iha laran, inklui negosiante ai-funan sira,” nia konklui.
Jornalista: Camilio de Sousa
Editor: Filomeno Martins
