SMASA Vikeke sosializa kona-ba kolleta dadus bee ba autoridade sira
VIKEKE, 25 Agostu 2026 (TATOLI)—Diresaun Servisu Água, Saneamentu no Ambiente (SMASA), Munisípiu Vikeke hamutuk ho parseiru PARTISIPA hosi nasaun Austrália, Tersa ne’e, realiza sosializasaun kona-ba kolleta dadus rekursu nian ba autoridade sira iha Munisípiu Vikeke.
Objetivu husi sosializasaun ne’e, atu halo identifikasaun ba rekursu bee-matan sira-ne’ebé lokaliza iha aldeia no suku sira iha Munisípiu Vikeke hodi hatene débitu bee no asesmentu komunidade nian.
Diretór SMASA Munisípiu Vikeke, Guilhermino Soares, haktuir sosializasaun ba mapeamentu rekursu bee-matan sira-ne’ebé lokaliza iha suku 38 iha Vikeke. Nune’e, sosializasaun ida-ne’e atu autoridade sira bele hatene molok ekipa sira tun ba identifikasaun rekursu bee-matan sira-nian.
“Tan-ne’e, ita realiza sosializasaun ida-ne’e ba autoridade sira iha Munisípiu Vikeke, atu ekipa sira ba rekolla rekurusu bee iha suku sira karik, autoridade sira bele koopera. Tanba dadus ba rekursu bee ne’e sai importante ba ita hodi tau ba planu dezenvolvimentu bee-moos nian,” Guilhermino Soares hateten iha Salaun Administrasaun Vikeke, Tersa ne’e.
Diretór SMASA hatutan durante ne’e dadus rekursu bee la atualiza ona iha sistema, tanba ne’e SMASA esforsu rekolla filafali dadus rekursu bee-matan nian, débitu bee nian.
“Iha tinan hirak liubá ita atualiza dadus rekursu bee nian iha sistema informasaun bee no saneamentu, maibé mudansa Governu, entaun ita paradu tiha atualiza dadus. Daudaun ne’e, ita iha oportunidade di’ak hodi atualiza fali dadus ne’ebé hetan apoiu husi Ministériu Administrasaun Estatál liuhusi Diresaun Nasionál Regulasaun Água no Saneamentu no apoia másima husi parseiru PARTISIPA,” nia subliña.
Tanba ne’e, nia husu autoridade postu no suku sira bainhira ekipa sira tun ba rekolla dadus autoridade sira tenke kolabora tanba autoridade sira mak na’in ba área rekurusu sira-ne’ebé lokaliza iha suku ida-idak ne’ebé eziste iha Munisípiu Vikeke.
“Rekolla dadus ba bee-matan nian ne’e, sosializasaun ida-ne’e hotu ami sei realiza formasaun ba funsionáriu sira SMASA no funsionáriu suku idaidak sira. Depoiz formasaun hotu iha fulan-Setembru ekipa sira ba rekolla dadus iha suku 38 iha Vikeke,” nia tenik.
Iha fatin hanesan, Prezidente Autoridade Munsípiu Vikeke, Francisco Cruz Simões de Gonzaga Soares, hato’o agradesimentu ba ekipa MAE no parseiru PARTISIPA husi Austrália hodi mai realiza sosializasaun ba mapeamentu rekursu bee-moos nian iha Munisípiu Vikeke.
“Ha’u sente mapeamentu ba bee ne’e sai importante tebes ba ita tanba bee mak fó moris ba ita ema, nune’e ita-nia moris ne’e 75% presiza bee. Tan ne’e mak bee sai importante ba ita-nia nesesidade moris loroloron. Ho ida-ne’e, SMASA hamutuk ho parseiru PARTISIPA hakarak realiza planu rekolla dadus bee iha Vikeke. Programa rekolla dadus bee ne’e bainhira realiza autoridade postu no suku sira tenke fó apoiu másimu,” nia hato’o.
Entretantu, partisipa iha sosializasaun ne’e hetan partisipa husi administradór postu lima (5), xefe suku, diretór servisu munisipál, ekipa PARTISIPA no ekipa MAE no funisionáriu sira iha Munisípiu Vikeke, sosialziasaun ne’e durante loron ida.
Jornalista: Vitorino Lopes da Costa
Editór: Xisto Freitas da Piedade
