Uma-kain 71 iha Suku Biadau-Akadiruhun simu ona notifikasaun atu hamamuk hela fatin
DÍLI, 25 Agostu 2026 (TATOLI) – Uma-kain 71 iha Aldeia Nuu Badak, Suku Akaderhun, Postu Administrativu Nain Feto, Munisípiu Dili, simu ona notifikasaun husi Sekretaria Estadu Asuntu Toponímia no Organizasaun Urbana (SEATOU) atu hamuk fatin hodi kumpri ba desizaun despezu administrative ne’ebé mak sei realiza iha inísiu fulan Novembru 2026.
Xefe Suku Bidau Akadiruhun, Juvinal da Conceição, hateten katak SEATOU fó ona notifikasaun ba uma-kain sira ne’e iha loron 1 Agostu 2026, ho períodu loron 90 atu sira bele prepara no sai husi área ne’ebé sira hela.
“Hau nia komunidade, hamutuk uma-kain 71 iha Aldeia Nuu Badak, simu ona notifikasaun iha 1 Agostu no sei sai husi fatin iha inísiu Novembru. Autoridade lokál halo ona diálogu ho komunidade sira no hotu-hotu aseita atu sai tuir data ne’ebé fó sai ona,” Xefe Suku Bidau-Akadiruhun, Juvinal ba TATOLI, ohin.
Juvinal esplika katak bazeia ba planu, governu sei konstrui edifísiu ho andar lima atu sai rezidénsia ba médiku no enfermeiru sira ne’ebé servisu iha Hospital Nasionál Guido Valadares (HNGV).
Tanba ne’e, komunidade ne’ebé hela iha área ne’e aseita atu sai husi fatin ne’e, bainhira Governu selu ona indemnizasaun.
“Verifikasaun dadus hotu remata ona. Uma-kain sira hotu submete ona kartaun eleitorál no konta bankária. Tanba ne’e, bainhira Governu transfere indemnizasaun ba kada uma-kain nia konta bankária, mak sira sei koopera atu husik fatin atu fó espasu ba Governu halo servisu dezenvolvimentu nasionál,” nia dehan.
Enkuantu, reprezentante uma-kain 71 iha Aldeia Nuu Badak, Filomeno Barreto, konfirma katak sira simu ona notifikasaun husi SEATOU atu sai husi fatin tuir tempu ne’ebé deside ona ba loron 90, hahu husi inísiu Agostu to’o inísiu Novembru.
Nia hateten katak, semana rua liubá, xefe suku no autoridade lokál halo ona diálogu ho komunidade kona-ba prosesu despezu administrative ba sira-nia hela fatin.
“Semana kotuk, ami hotu-hotu entrega ona dokumentus, hanesan kartaun eleitorál no númeru konta bankária, atu Governu bele transfere indemnizasaun ba ami ida-idak nia konta bankária,” nia hateten.
Nia mos hateten katak uma-kain sira hotu asina ona termu aseitasaun no prontu atu koopera ho Governu.
“Termu aseitasaun ami asina hotu ona. Ami prontu atu koopera no sai husi fatin ne’e bainhira ami simu ona indemnizasaun husi Governu,” nia konklui.
Uma-kain afetadu sira husu Governu atu garante katak prosesu realokasaun lao ho transparénsia, justu no respeitu ba direitu sidadaun sira nian, liuliu iha aspetu indemnizasaun no preparasaun hela fatin foun ba sira.
Jornalista: Camilio de Sousa
Editór: Filomeno Martins
