Bobonaru simu envelope fiskál OJE 2027 hamutuk millaun $11-resin
DILI, 26 Agostu 2026 (TATOLI)—Prezidente Autoridade Munisípiu Bobonaru, Paulo Moniz, informa iha tetu Orsamentu Jerál Estadu (OJE) 2027 ne’e, Bobonaru hetan ona envelope fiskál husi Governu hamutuk millaun $11-resin la inklui kona-ba planu adisionál ne’ebé Bobonaru prioriza.
“Entaun tinan 2027 ami iha planu no atividade barak hanesan agrikultura, turizmu, edukasaun, saúde, área ne’ebé ami diskute tiha ona mak iha parte agrikultura tanba atu hadi’a irrigasaun barajen ba konservasaun bee.
Ami mós sei halo rekrutamentu ba estensionista sira iha kada suku liuliu ba iha área Maliana nian hodi tau matan natar”, PAM Bobonaru relata ba jornalista sira iha Ministériu Finansas, ohin.
Nia reforsa tan katak prioridade seluk mak iha área turizmu ne’ebé sira tau ba planu hamutuk iha sítiu tolu maka hanesan Bee manas Marobo, Beamalae no iha Lesululi Kailaku, entaun fatin sira-ne’e presiza estabelese tan fasilidades atu vizitante sira ba bele asesu hanesan bee, haris fatin no seluk tan.
“Nune’e Bobonaru mós bele hetan reseitas doméstika husi vizitante sira husi nasionál no internasionál, tanba ne’e mak ita tenke tau planu ida”, nia afirma.
Tanba ne’e nia dehan sira planea sosa viatura (mini bus) tolu hanesan ne’e hodi fasilita tula vizitante sira-ne’ebé hakarak ba vizita sítiu turístiku sira iha Bobonaru
Nia hatutan, iha sira-nia proposta hakarak halo rekrutamentu ba funsionáriu públiku tanba sira-nia forsa traballu sei menus, maibé seidauk aprova tanba sei kontinua diskute fali iha loron tuir mai.
Jornalista : Alexandra da Costa
Editór : Cancio Ximenes
