Ekipa BAZERA sei tama-sai uma vasina kontra raiva iha Baukau
BAUKAU, 26 Agostu 2026 (TATOLI)–Ekipa Task Force Baukau Zero ba Moras Raiva (BAZERA) planeia sei tama-sai tuir uma atu vasina kontra raiva (rabies) ba asu iha Baukau
Portavóz Ekipa Task Force Kombate Raiva, ne’ebé mós atuál Sekretária Munisípal Asuntu Sosiál no Organizasaun Komunitária, Maria Celestina Viegas, husu ba entidade no komunidade hotu atu hametin kooperasaun hodi prevene propagasaun raiva iha Munisípiu Baucau iha-ne’ebé parte Autoridade Munisipál Baucau bazeia ba karta sirkulár konjunta husi Governu Sentrál ne’ebé aplika iha territóriu tomak.
“Kona-ba kazu raiva nian, ekipa Task Force hetan katak Munisípiu Baucau iha kazu ne’ebé aas. Tanba nee, ita husu ba parte hotu atu hasees aan husi kazu raiva iha Munisípiu Baucau,” Maria Celestina hateten iha Salaun Soi Mali Administrasaun Munisipál Vila Nova, Baukau, Kuarta ne’e.
Maria Celestina relata prosesu vasinasaun ba asu iha Baucau seidauk ramata, tanba foin kobre de’it área Postu Administrativu Vemasse, enkuantu postu administrativu sira seluk iha Munisípiu Baucau asu sira maioria seidauk hetan vasinasaun.
Nune’e, iha inísiu Agostu ne’e, ekipa Bazera hahú fali vasina iha Postu Administrativu Baucau Vila ho totál asu 100-resin lokaliza iha Suku Gariuai, Triloka, Tirilolo no Bahú ne’ebé kategoriza área risku ba raiva.
“Husi ekipa Task Force, ita husu ba entidade hotu atu koopera. Tanba semana ida ka rua mai tan, ita hakarak atu hala’o vasinasaun ba asu sira hotu,” Maria Celestina apela.
Entertantu, tuir informasaun, kazu Raiva iha Baukau sa’e ona ba 14 iha-ne’ebé antes ne’e rejista hamutuk haat kompostu pozitivu rua no suspeitadu na’in-rua, kompostu ida akontese tata abitante na’in-rua iha Aldeia Uaturau, Suku Gariuai, ida iha Aldeia Ana-Ulo, Vila Antiga, Suku Bahú no rua seluk iha Watulete, Vila Nova, Suku Tirilolo.
Jornalista: Natalino Belo
Editór: Xisto Freitas da Piedade
