Governu aprova toleránsia pontu ba preparasaun trasladasaun restu mortál bispu na’in-tolu husi Portugál
DILI, 26 Agostu 2026 (TATOLI)—Governu liuhusi reuniaun Konsellu Ministru, kuarta ne’e, aprova toleránsia pontu iha loron 01 no loron 10 fulan-Setembru 2026 ba preparasaun transladasaun restu mortál husi Dom Jaime Garcia Goulart, Dom José Joaquim Ribeiro, Monseñór Martinho da Costa Lopes no Dom Alberto Ricardo da Silva.
Proposta ne’e aprezenta husi Ministru Administrasaun Estatál, Tomás do Rosário Cabral, ne’ebé, ko’alia kona-ba programa omenajen sira-ne’ebé organiza hamutuk hosi Governu no Konferénsia Episkopál Timorense, ne’ebé inklui resepsaun ofisiál ba restu mortál iha Dili, iha loron 01 fulan-setembru 2026, serimónia iha Tasi-Tolu no trasladasaun tuirmai ba sira ida-idak nia fatin deskansa nian.
Vise-Ministru Asuntu Parlamentár, Adérito Hugo da Costa, hateten ohin Konsellu Ministru aprova loron 01 no 10 fulan-Setembru nu’udar loron toleránsia pontu ba serimónia simu no misa ba restu mortál husi Amu Bispu na’in-tolu ne’ebé translada husi Portugál.
“Tanba iha loron 01 sei simu urna restu mortál iha Aeroportu Nicolau Lobato no kontinua misa agradesimentu iha loron 10 ne’ebé sei hala’o iha Tasi-Tolu,” Vise-Ministru ne’e relata ba jornalista sira iha Palásiu Governu, ohin.
Nia hatutan, signifika katak toleránsia pontu ne’e akontese de’it iha loron rua ne’ebé Governu determina ona, restante ne’e la feriadu ida ka hala’o atividade hanesan baibain.
Enkuantu, inisiativa ne’e ho objetivu atu fó omenajen ba preladu sira-ne’e nia legadu espirituál, istóriku no nasionál nomós rekoñese sira-nia kontribuisaun ba povu no istória Timor-Leste nian.
Jornalista : Alexandra da Costa
Editór : Cancio Ximenes
