Governu bandu karreta rentál husi Indonézia tula pasajeiru tama Timor-Leste
DILI, 26 Agostu 2026 (TATOLI)-Diresaun Nasionál Transporte Terrestre (DNTT) informa katak, komesa loron 27 Agostu, Governu bandu karreta rentál husi Indonézia atu tula pasajeiru tama Timor-Leste ka lori pasajeiru husi Timor-Leste bá Indonézia.
Xefe Departamentu Sekretariadu Apoiu Tékniku Administrasaun iha DNTT, Nelson Sequeira Martins, hatete katak desizaun ne’e bazeia ba akordu entre Governu Timor-Leste no Indonézia kona-ba transporta pasajeiru entre nasaun rua.
Tuir akordu ne’e, transporta pasajeiru liuhusi fronteira terresntre sei hala’o de’it husi bus no aperadór transporte ne’ebé autorizadu, inklui DAMRI no travel husi Indonézia to’o fronteira, ne’ebé sei simu fali husi travel husi Timor-Leste.
“Durante ne’e ita-nia públiku kestiona maka’as karreta rentál sira husi Indonézia ne’ebé tula pasajeiru tama mai livre no buka pasajeiru livre no tula bá Indonézia. Hahú aban karreta sira ne’e ita bandu tama mai Timór, tanba bazeia ba nota entendimentu ne’ebé Governu rua asina ona iha loron 19 Jullu 2022, ne’ebé mensiona de’it katak bus mak bele tula pasajeiru livre tama no sai”, Nelson Sequeira Martins afirma ohin.
Nia realsa katak desizaun atu hapara operasaun karreta rentál ne’e diskute iha reuniaun ministériu relevante sira, inklui Autoridade Aduaneira (AA/Alfándega) ne’ebé hala’o iha fronteira terrestre Batugadé.
“Husu ba públiku tomak katak hahú aban ba leten hakarak ba Indonézia bele bá ho travel to’o fronteira ka bá ho Babadok. Nune’e mós ba maluk sira ne’ebé hakarak mai Timór ho motór bele rai iha fronteira, aluga fali husi ita-nian”, nia apela.
Dirijente ne’e esplika katak karreta privadu husi Indonézia hakarak tama Timor-Leste atu vizita família ka halo atividade bele tama normalmente, maibé labele uza karreta ne’e atu buka ka tula pasajeiru.
Nia dehan Governu tenke aplika medida ne’e atu asegura balansu iha implementasaun akordu, tanba karreta husi Timor-Leste bá Indonézia mós enfrenta restrisaun hanesan. Ba oin, veíkulu ne’ebé viola regra sei hasoru sansaun tuir orden autoridade kompetente, inklui multa $45.
“Objetivu ita implementa ne’e la’ós atu impede movimentu maluk sira-nian, maibé hakarak kria balansu, tanba durante ne’e ita kumpre, maibé sira la kumpre. Entaun, ba oin sira mai tenke to’o de’it iha fronteira”, nia afirma.
Nelson rekoñese katak situasaun sira ne’e akontese tanba iha falta koordenasaun entre parte sira. Maibé, depoizde enkontru parte hothotu preokupa no deside hapara.
Jornalista: Arminda Fonseca
Editora: Maria Auxiliadora
