Governu prevee millaun $428,99 ba fornesimentu kombustivel iha sentrál elétrika Hera-Betanu
DILI, 26 Agostu 2026 (TATOLI)—Ministru Obra Públika (MOP) aprezenta prosedimentu ba prosesu konkursu públiku ne’ebé sei fornese kombustível ba sentrál elétrika Hera no Betanu durante tinan tolu ho orsamentu hamutuk millaun $428,99.
Proposta ne’ebé aprezenta husi Ministru Obra Públika, Samuel Marçal ne’e Konsellu Ministru delibera hodi ratifika aktu sira-ne’ebé autoriza despeza no desizaun hodi loke prosedimentu aprovizionamentu liuhusi konkursu públiku ba akizisaun kombustível ne’ebé destina ba sentrál elétrika Hera no Betanu.
“Prosedimentu ne’e ho objetivu atu garante kontinuidade fornesimentu kombustível hahú husi fulan-Janeiru 2027. Nune’e, garante operasaun husi sentrál elétriku rua no produsaun eletrisidade iha nasaun ne’e, hafoin termina kontratu fornesimentu atuál sira-ne’ebé marka ona ba fulan-Dezembru 2026,” nia esplika iha Palásiu Governu, ohin.
Nia hatutan, kontratu tinan tolu ne’e ho objetivu mós atu fornese estabilidade boot-liu iha fornesimentu, fasilita jestaun ba rezerva kombustível sira no permite atu hetan folin sira-ne’ebé vantajozu liu.
Enkuantu despeza ne’e iha valór másimu estimadu totál millaun $428,99 no fahe ba lote rua: maizumenus millaun $316,31 ba fornesimentu mina ho litru millaun 372,5 ba sentrál elétrika Hera, no millaun $112,67 ho litru millaun 129,9 ne’ebé destinadu ba sentrál elétrika Betanu.
Jornalista : Alexandra da Costa
Editór : Cancio Ximenes
