Governu prevee rihun $150 ba Komemorasaun Konsulta Populár iha Manatutu
DILI, 26 Agostu 2026 (TATOLI)–Governu liuhusi Ministériu Administrasaun Estatál (MAE) prevee orsamentu ba Komemorasaun Loron Konsulta Populár ba da-XXVII (30 Agostu 1999-30 Agostu 2026), iha Munisípiu Manatutu.
“Orsamentu $150.000 atu atende atividade oioin hanesan reflesaun, konsertu, prémiu, konsome no seluk tan. Kona-ba tema, laiha, maibé ita uza banner hodi publika imajen istória 30 Agostu 1999 nian,” Diretór Jerál Servisu Kooperativa MAE, Ângelo Urbano Fernandes dehan ba TATOLI, via Whatsapp, Kuarta ne’e.
Kona-ba preparasaun, nia dehan, MAE fó informasaun ba munisípiu hotu-hotu katak iha 28 Agostu 2026, sei hala’o limpeza jerál, iha munisipiu hotu-hotu inklui kapitál Dili.
Tanba ne’e, iha 29 Agostu, sei konsentra iha Autoridade Manatutu hodi hala’o misa agradesimentu ba Loron Konsulta Populár, depoiz misa sei kontinua halo reflesaun no halo palestra ne’ebé sei ko’alia kona-ba ámbitu 30 Agostu Konsulta Populár iha pasadu no futuru, no ligasaun ho munisípiu sira desentralizasaun ligadu ho Balkaun Úniku.
Iha 30 Agostu 2026, nia informa, hala’o marsa saudável husi ponte Manatutu la’o mai to’o iha Obratu Manatutu. Kona-ba konsertu muzikál sei envolve grupu Lahane, ne’ebé iha 1999 lori múzika “Oras To’o Ona”, iha 29 Agostu.
Aleinde ne’e, Ângelo esplika, iha mós dada rifa prémiu ne’ebé prepara liliu materiál eskola nian, hanesan pasta, livru no kadernu sira-ne’e no mós iha prémiu eletróniku balun hanesan mobille, bisikleta, laptop no motór, ne’ebé sei hala’o iha 30 Agostu.
Nia hatutan Komemora Konsulta Populár sei envolve munisípiu hotu-hotu, para konsentra iha Manatutu.
Tuir nia katak sei fó subsídiu ba negosiante baraka 35 iha Obratu atu prepara hahán ba sira-ne’ebé maihusi munisípiu.
Kona-ba orsamentu ba hahán nian, Ángelo esklarese, kalkulasaun bele $300-$500 maibé bele menus hosi ida-ne’e.
Jornalista: Osória Marques
Editór: Xisto Freitas da Piedade
