MJDAK estimula kreatividade estudante RAEOA liuhusi kompetisaun nível internasionál

OEKUSI, 26 Agostu 2026 (TATOLI) – Ministériu Juventude, Desportu, Arte no Kultura (MJDAK) liuhusi Diresaun Jerál Arte Kultura, kuarta ne’e, estimula kreatividade estudante ho idade entre tinan-neen no 12, liuhusi kompetisaun dezeñu ‘Mitsubishi Asian Cildren’s Enikki Festa Timor-Leste 2026-2027’ iha Rejiaun Administrativa Espesiál Oekusi Ambeno (RAEOA), ho prémiu husi empreza Eniki, Japaun.

Diretór Jerál Arte no Kultura, Agil Paulino Santos Oliveira, esplika, atividade ne’e realiza liuhusi kooperasaun entre Sekretáriu Estadu Arte Kultura (SEAK) hamutuk ho empreza Eniki Festa husi Japaun, hodi dezenvolve konseitu dezeñu ba estudante sira, iha estabelesimentu ensinu primáriu ho idade tinan neen to’o 12, ne’ebé hala’o kada tinan rua dala ida.

“Objetivu husi kompetisaun ne’e, atu buka estudante sira-nia talentu iha parte dezeñu no pinta nian, buka atu hatene espresaun estudante sira-nia koñesimentu liga ba situasaun moris lorloron iha sira-nia ambiente,” nia hateten iha Eskola Tékniku Vokasionál Palaban Oekusi, ohin.

Simu prémiu iha Japaun

Nia informa, programa ne’e hala’o ona iha tinan hirak liubá, no suspende iha situasaun pandemia Covid-19, no reativa hikas iha 2023 no kobre ona munisípiu 13 no tinan ne’e implementa ba munisípiu tolu RAEOA, Bobonaro no Vikeke.

“Depoizde rezultadu husi kompetisaun ne’e, ekipa tékniku sei rekolla no enkamiña ekipa juri independente iha nasionál hodi halo aváliasaun, husi rezultadu aváliasaun ne’e sei manda ba iha kompañia Eniki iha Japaun hodi halo aváliasaun ikusliu mak foin hatene ida-ne’ebé mak hetan klasifikasaun di’akliu ba kompetisaun ne’e,” nia hateten.

Nia lembra fali katak, iha tinan-2023 manán-na’in husi munisipíu Kovalima no estudante ne’ebé sai klasifikasaun akompaña ho nia inan-aman reprezenta Estadu Timor-Leste ba simu prémiu iha Japaun, hanesan mós iha 2025 manán-na’in husi munisípiu Likisá tanba klasifikasaun ne’e iha oin rua: klasifikasaun dahuluk to’o ualu simu prémiu iha nasionál no mellór klasifikasaun ne’e simu iha Japaun.

“Kompetisaun ne’e livre. Estudante idak-idak bele espresa nia dezeñu tuir nia koñesimentu, ezemplu bele foti ambiente moris iha família, bele haree beleza ruma furak, bele espresa liuhusi nia pinta ne’e. Ne’ebé, laiha kritéria ida katak tenke pinta dezeñu hanesan ne’e, maibé espresaun ne’e livre, importante espresaun ne’e reprezenta nia ideia ne’ebé iha ona,” nia hateten.

Notísia relevante:Komemora loron mundiál labarik, KNDL realiza kompetisaun dezeñu

Sekretária Rejionál Asuntu Sosiál no Organizasaun Komunitária, Merita Marques Lafo, konsidera katak eventu ne’e importante tanba bele kontribui dezenvolve kapasidade estudante sira-nian.

“Kompetisaun ne’e nível internasionál ne’ebé kapaas tebes, tanba liuhusi kompetisaun ne’e bele prezerva ita-nia kultura no dezenvolve labarik sira-nia kapasidade no hanoin tanba liuhusi dezeñu labarik sira iha ona imajinasaun, ezemplu dezeñu ba uma tradisionál sira, belak, inklui fatin istóriku sira iha Timor. Entaun, labarik sira-nia imajinasaun ne’e komesa nakloke, tanba kompetisaun ne’e ba liu idade minoridade sira, ne’ebé kapaas tebes, entaun ita-nia esperansa, bele realiza kada tinan nu’udar eventu nasionál nune’e bele dezenvolve kapasidade oan sira,” nia konsidera.

Jornalista: Abílio Elo Nini

Editór: Rafael Ximenes de A. Belo