MS-OMS halo “Media Briefing” ba jornalista sira atu kobertura ba RC79 iha TL
DILI, 26 Agostu 2026 (TATOLI)—Ministériu Saúde servisu hamutuk ho Organizasaun Saúde Mundiál iha Timor-Leste realiza media briefing ba jornalista sira hamutuk na’in-30 atu halo kobertura ba enkontru Komité Rejionál SAERO ba da-79 ne’ebé mak sei realiza iha Timor-Leste hahú husi loron 07-10 Setembru 2026.
“Objetivu enkontru ne’e Ministériu Saúde hamutuk Organizasaun Saúde Mudiál iha Timor-Leste konvida mídia tanba ajenda primeriu ita sei foka liu relatóriu AI no tuir kedas ho ajenda kona-ba programa no Governasaun. Tanba atividade enkontru ne’e sei akontese iha 07-09 Setembru ne’e, sei mai husi estadu membru husi nasaun sia (9) SEARO nian. Enkontru ne’e sei partisipa mós husi Nasaun Unida no mós husi Sosiedade Sivíl,” Diretór Jerál Servisu Kooperativu iha Ministériu Saúde, Narcisio Fernandes, hateten ba jornalista sira iha Sala Enkontru OMS, Kaikoli, ohin.
Programa ne’ebé sei hala’ao iha Timor-Leste ne’e sei hala’o abertura no realiza iha Sentru Knvensaun Dili (CCD), hafoin ne’e sei tuir kedas ho reuniaun negósiu ne’ebé sei hala’o husi loron 07 to’o loron 10 no reuniaun tuir mai sei hala’o iha Palm Spring Fatuhada.
”Papél mídia nian importante, tanba ne’e mak Ministériu Saúde hamutuk Organizasaun Saúde Mudiál konvida mídia sira atu partisipa media briefing, tanba média sira mak matan no tilun ba komunidade,” nia dehan.
Nia haktuir, MS ho OMS konvida mídia atu partisipa husi enkontru RC 79 ne’ebé importante tebes ne’e, atu nune’e mídia sei kontinua fahe no atualiza informasaun kona-ba progresu no atividade sira husi RC 79, mídia sei fahe ka fornese informasaun kona-ba objetivu husi enkontru ne’e.
Objetivu seluk tan mak partisipasaun mídia nian sei serve mós ba rezultadu finál husi enkontru RC.
“Tanba ne’e, ami hakarak mós enkoraja ita-boot sira mídia. Ami husu partisipasaun mídia nian durante atividade hotu-hotu, hahú husi loron dahuluk to’o loron ikus enkontru nian iha Setembru. Ho nune’e, ami husu atu kontinua fó informasaun no atualiza loron ba loron kona-ba progresu no diskusaun sira-ne’ebé ita halo,” nia dehan.
”Maibé ba ajenda balun ne’ebé espésifiku, ami la fó lisensa ba mídia atu foti. Tanba ne’e konfidensiál ba Estadu membru sira no inklui mós ajenda balun ne’ebé taka ba mídia,” nia esplika.
Iha fatin hanesan, Reprezentante Organizasaun Saúde Mudiál iha Timor-Leste, Arvind Mathur, informa iha loron 07 fulan-Setembru sei iha abertura RC da-79, OMS sei foka ba diálogu saúde Globál nian.
“Ba ita-boot sira-ne’ebé ha’u la haree iha ekrán maibé ne’ebé mós partisipa online, liuliu ba ita-nia belun sira husi mídia, husi nivel nasionál, rejionál no global. Tanba ne’e mak OMS halo Workshop sensibilizasaun ba mídia kona-ba Sesaun da-79 Komité Rejionál WHO nian iha Sudeste Aziátiku-RC 79,” Arvind Mathur relata.
Nia dehan, enkontru ne’e organizadu hamutuk ho OMS Rejionál Sudeste Aziátiku, tanba OMS TL atu sai na’in uma ba RC 79.
“Ida-ne’e onra boot ida nomós oportunidade boot ida. Ho ida-ne’e ami husi nasaun iha sentru diálogu saúde globál no rejionál, atu hatudu ita-nia progresu, fahe esperiénsia no mós aspirasaun ba rejiaun sira no importante liu mak atu halo rede, aprende husi Estadu Membru sira seluk,” nia hateten.
Nia dehan, susesu RC 79 nian la’ós de’it iha sala konferénsia laran, susesu ne’e dependente mós ba diskusaun, desizaun no mensajen sira to’o ba públiku.
“Ne’e mak ami-nia kolega sira husi ekipa komunikasaun nian no liuliu ita-boot sira mídia, iha papél vital tebes. Ita mak parseiru atu informa no objetivu Workshop ohin nian mak atu fó ba mídia, mensajen prinsipál sira kona-ba Komité Rejionál da-79 nomós ajenda prioridade sira no mós oportunidade sira ba mídia. Tanba ne’e, husu ba mídia atu partisipa ativu, atu halo reportajen ho klaru, balansu no ho perspetiva,” nia esplika.
Jornalista : Felicidade Ximenes
Editór : Cancio Ximenes
