OJE 2027, RAEOA propoin millaun $50 prioriza setór ‘xave estratéjiku’ sira
OEKUSI, 26 Agostu 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), liderada Régio da Cruz Salu, propoin millaun 50 iha tetu Orsamentu Jerál Estadu (OJE) 2027 nian.
Husi verba ne’e, tuir Régio da Cruz, fahe ba rua – ba funsionamentu administrasaun RAEOA millaun $20 no Fundu Espesiál Dezenvolvimentu (FED) millaun $30.
“Ida sei la’ós finál, sei tetu hela iha sorumutu Komite Revizaun Polítika ba Preparasaun Orsamentu Jerál Estadu (OJE) 2027nian,” nia hateten ba Ajénsia TATOLI,I.P via WhatsApp, ohin.
Autoridade másima RAEOA ne’e informa katak, Komite Revizaun Polítika ba preparasaun OJE tinan-2027 ne’e, aprova husi Konsellu Ministru, ho objetivu atu garante katak, planu anuál husi servisu no entidade setór públiku administrativa viavel no aliñadu ho prioridade nasionál, ne’ebé estabelese iha planu estratéjiku dezenvolvimentu tinan 2011-2030, iha programa Governu iha planu tempu média, iha dokumentu estratéjiku sira seluk.
“Reuniaun Komite Revizaun Polítika ba Preparasaun OJE tinan-2027 ne’e, hala’o ona horsehik iha salaun enkontru Ministériu Finansa Aitarak Laran Díli, ne’ebé mak prezide direta husi sua exelénsia Primeiru Ministru Kay Rala Xanana Gusmão,” nia haktuir.
Notísia relevante:Komisaun C rekomenda medida urjente ba ezekusaun kapitál dezenvolvimentu
Prezidente Autoridade RAEOA ne’e esplika katak OJE 2027 ba RAEOA hamutuk millaun $50, atu reforsa programa prioridade rua mak hanesan infraestrutura bázika, ligadu ba konetividade hanesan ponte no estrada, eletrisidade, bee-moos no seluktan.
Prioridade daruak maka diversifikasaun ekonómika, redusaun pobreza, edukasaun, saúde familiár no kapasitasaun rekursu umanu, inklui ba podér lokál.
“Proposta RAEOA nian ba OJE tinan-2027 ho montante millaun 20 ba RAEOA, no millaun 30-resin ba FED, iha diskusaun Komite Revizaun Polítika ba preparasaun OJE tinan-2027 ne’e, sei iha diskusaun kona-bá rasionalidade, liliu atu reajusta buat ne’ebé mak presiza”, nia hateten.
Entretantu, ezekusaun ba OJE 2026 atuál to’o trimestre datoluk, atinje ona 30% resin no garante katak, to’o fim do ano, sei atinje to’o 80%.
Jornalista: Abílio Elo Nini
Editór: Rafael Ximenes de A. Belo
