ONG Mane Vizaun Foun realiza diálogu kona-ba protesaun direitu labarik iha Baukau
BAUKAU, 26 Agostu 2026 (TATOLI)–Organizasaun Naun Governamentál (NGO) Mane Vizaun Foun, Kuarta ne’e, realiza diálogu no koordenasaun multisetoriál ho estudante kona-ba proteje direitu labarik iha Munisípiu Baukau.
Jestór Programa Mane Vizaun Foun, Vidal Duarte Gaspar, esplika aleinde direitu ba moris, labarik mós tenke hetan protesaun no partisipasaun liuliu direitu asesu ba edukasaun nune’e bele partisipa iha prosesu dezenvolvimentu.
“Direitu labarik nian buat barak hanesan direitu ba moris, protesaun no partisipasaun. Se direitu ba moris mak ita dehan husik moris de’it, maibé oinsá ita bele garante nia moris no oinsá bele garante nia dezenvolvimentu,” Vidal Gaspar hateten iha Salaun Soi Mali Administrasaun Munisipál Vila Nova, Baukau.
Vidal Gaspar relata diálogu ho parte relevante sira importante atu analiza hamutuk asaun ne’ebé presiza hala’o ba futuru, hodi hametin protesaun no promove direitu labarik.
Atividde diálogu ne’e partisipa husi Alumni Parlamentu Foinsa’e Timor-Leste, Asosiasaun Ema ho Defisiénsia, reprezentante Sekretaria Estadu Igualdade, Polísia VPU no entidade relevante sira seluk, ne’ebé servisu iha área protesaun direitu labarik, igualdade jéneru no prevensaun violénsia.
“Durante tinan tolu ne’e ita hala’o atividade sira hanesan fahe informasaun ne’ebé relevante liu kona-ba oinsá ita halo protesaun ba direitu labarik,” Vidal haktuir.
NGO Mane Vizaun Foun durante tinan-tolu hala’o atividade iha Munisípiu Baukau ne’ebé lokaliza iha eskola haat hanesan EBC Osokeli, ETV Baukau, EBC Laga no eskola ida iha Postu Administrativu Kelikai ho objetivu atu fahé informasaun relevante ba komunidade kona-ba protesaun no direitu labarik, prevene violénsia hasoru labarik, elimina pratika diskriminatória no hametin papél sosiedade sivíl iha defeza direitu labarik.
Tuir planu, dialogu ne’e hala’o durante loron rua (26-27 Agostu) iha Salaun Soi Mali, ne’ebé hetan partisipasaun husi estudante no entidades relevante sira hanesan Alumni Parlamentu Foinsa’e Timor-Leste, Asosiasaun Ema ho Defisiénsia, reprezentante Sekretaria Estadu Igualdade, Polísia VPU no seluk tan.
Jornalista: Natalino Belo
Editór: Xisto Freitas da Piedade
