RAEOA prioriza diversifikasaun ekonomia hodi redús mukit iha 2027
DILI, 26 Agostu 2026 (TATOLI)—Prezidente Autoridade Rejiaun Administrativa Espesiál Oekusi-Ambenu (RAEOA), Régio da Cruz, hateten iha Komité Revizaun Polítika 2027 ne’e RAEOA prioriza eleva diversifikasaun ekonomia hodi redús mukit.
Prezidente Autoridade RAEOA, Régio da Cruz, hateten iha KRP ne’e kontinua fó prioridade ba konetividade projetu infraestrutura bázika (eletrisidade, ponte, estrada bee no eletrisidade) no diversifikasaun ekonomia hodi redús pobreza no harii sentru dezenvolvimentu ekonomia azúl nivel komunitária.
“Ami mós hakarak promove edukasaun liuhusi formasaun, saúde bázika no ikus liu mak preparasaun ba podér lokál tuir diploma ministeriál foun iha estrutura orgániku ne’ebé klaru tebes,” nia dehan.
Tanba ne’e, nia dehan, iha diskusaun PPG ne’e sira foka liu ba operasionalidade atu aumenta ka reajusta.
“Diversifikasaun ekonomia Oekusi iha rekursu potensiál turizmu ne’ebé bele atrai ema hodi ba vizita no investe ba, maibé ita presiza kapasita rekursu umanu hodi jere rekursu sira ho di’ak,” nia hateten.
Enkuantu, nia dehan, proposta tetu orsamentu 2027 ne’e hamutuk millaun $20 ba RAEOA no millaun $30 ba Fundu Espesiál Dezenvolvimentu (FED), maibé orsamentu sira-ne’e seidauk aprova tanba foin iha faze debate.
Tanba ne’e, nia hatutan, durante diskusaun iha rekomendasaun ho mudansa re-estrutrutura orgánika iha meadu Governasaun da-sia, nune’e tinan oin (2027) sira sei laiha prosesu rekrutamentu ba funsionáriu sira no presiza ajusta de’it direitu inklui obrigasaun institusionál administrasaun governativa nian.
Jornalista : Alexandra da Costa
Editór : Cancio Ximenes
