Suku Fatudere hahú espande sede suku
VIKEKE, 26 Agostu 2026 (TATOLI)—Xefe Suku Fatudere, Postu Administrativu Vikeke Vila, Munisípiu Vikeke, Jerónimo Soares Alves, informa Programa Nasionál Dezenvolvimentu Suku (PNDS) ba tinan 2026 nian halo ona alargamentu ba Sede Suku Fatudere.
“Kona-ba programa PNDS ba tinan 2026 nian halo alargamentu ba sede suku. Ami-nia agora daudaun iha faze implementasaun. Ita-nia badaen sira komesa hada fondasi, cor sinta no ateru uma laran, depoiz hotu komesa hada batako uma nian,” Jerónimo Soares Alves dehan ba TATOLI, iha Suku Fatudere, Kuarta ne’e.
Autoridade Suku Fatudere hatutan programa alargamentu sede suku ne’e sai prioridade ba suku sira tanba sede antes ne’e medida ki’ik, entaun difikulta ba atendimentu sira no fatin ba funsionáriu suku haat (4) mós laiha.
“Tan ne’e, iha tinan ida-ne’e ita halo alargamentu ne’e aumenta tan kuartu rua, hodi funsionáriu sira uza ba atendimentu ba ita-nia populasaun iha Suku Fatudere. Antes ne’e, sede suku metru 10×7, no agora ita aumenta tan nia luan ba metru 3×7. Nune’e, sei konstrui sala rua. Husi sala rua ne’e ita fahe ba sala administrasaun no sala enkontru ba konsellu suku nian,” nia relata.
Nia subliña espansaun sede suku agora sufisiente ona ba atendimentu, maibé salaun ba enkontru ho komunidade mak daudaun ne’e sei kloot, maibé autoridade suku sei haree bainhira orsamentu restu iha sei kria salaun ida iha sede suku nia kotuk.
“Ami haree sala ba atendimentu ne’e sufisiente ona, maibé salaun mak ki’ik. Nune’e, ami sei haree konstrusaun ida-ne’e mak osan restu karik, ami sei konstrui salaun ida iha sede suku nian kotuk, maibé depende ba osan. Ami obra konstrusaun ba espansaun sede suku ne’e obra fizikamente atinje ona 25%,” nia informa.
Kona-ba obra alargamentu sede suku, aloka orsamentu husi PNDS ba 2026 hamutuk rihun $14, ne’ebé konstrui husi badaen lokál sira husi Suku Fatudere, durasaun fulan tolu.
Tuir dadus, Suku Fatudere ho totál populasaun hamutuk 682 no uma-kain 169, aldeia tolu kompostu husi Aldeia Aidilalita, Barabeto no Culale.
Jornalista: Vitorino Lopes da Costa
Editór: Xisto Freitas da Piedade
