Inundasaun hamate ema na’in-157 iha Nepál
DILI, 27 Agostu (TATOLI) – Númeru mate tanba inundasaun sira iha norte Nepál nian atinje ona 157, fó-sai husi polísia iha loron-kuarta kalan.
Ema na’in-41 seluk ne’ebé hetan kanek iha inundasaun hetan hela tratamentu iha ospitál sira, haktuir hosi komunikadu polísia nian.
Molok ne’e iha loron hanesan, pelumenus ema na’in-95 mate no na’in 484 seluk lakon iha inundasaun boot ida iha norte Nepal nian iha loron-kuarta, haktuir hosi Gabinete Primeiru-Ministru nian.
Entre sira ne’ebé lakon iha turista estranjeiru na’in-391 no sidadaun nepalés na’in-93, haktuir hosi eskritóriu iha komunikadu. Tuir rejistu hosi Konsellu Turizmu Nepál nian, sidadaun estranjeiru sira ne’ebé lakon inklui indianu na’in-134, amerikanu na’in-47, britániku na’in-33 no australianu na’in-34.
Antes ne’e, Rajendra Prasad Dhamala, porta-vós hosi Polísia Provínsia Bagmati, hatete katak forsa seguransa sira salva ona ema na’in-88 hosi área afetadu sira.
Primeiru-ministru Nepál nian, Balendra Shah, konvoka ona reuniaun emerjénsia ida hosi gabinete hodi ko’alia kona-ba medida sira salvamentu no tulun nian.
Ezérsitu nepalés, hetan apoiu hosi forsa seguransa sira seluk, intensifika ona operasaun sira buka no salvamentu nian iha munisípiu sira ne’ebé afetadu.
Estragu sira ne’ebé maka’as liu mak relata ona iha Rasuwa, ne’ebé maka inundasaun lori uma oioin, estraga merkadu, projetu idroelétriku, estrada no infraestrutura sira seluk.
“Ema balun maka lakon. Esforsu sira salvamentu nian hala’o daudaun,” Druba Prasad Adhikari, vise-xefe distritál Rasuwa nian, hatete ba Xinhua antes.
Entretantu, autoridade sira iha estadu indianu orientál Bihar iha loron-kuarta ne’e aumenta preparasaun hafoin inundasaun lalais ne’ebé hamosu estragu iha Nepál, haktuir hosi responsável sira.
Alerta ida fó-sai ona iha distritu neen estadu nian – Champaran Oeste, Champaran Leste, Gopalganj, Saran, Muzaffarpur no Vaishali – no área sira ne’ebé rai-tetuk tau ona iha vijilánsia maka’as iha sistema mota Gandak nia sorin.
Fonte: Xinhua
