Primeiru-Ministru kondena asaun estraga Panel RMU no LV eletrisidade iha Bekora 

DILI, 27 Agostu 2026 (TATOLI) – Primeiru-Ministru, Xanana Gusmão, kondena maka’as asaun ema deskoñesidu ne’ebé estraga odamatan Panel Ring Main Unit (RMU) no Panel Low Voltage (LV) iha sistema eletrisidade subterráneu (underground) iha área Kuluhun-Bekora, liuliu iha igreja Bekora oin.

Xefe Governu apela ba komunidade, liuliu joven sira, atu hametin dame no proteje infraestrututra públiku, tanba infraestrutura eletrisidade ne’e harii ho osan povu nian no iha importánsia ba moris komunidade.

“Husu ba komunidade tomak atu haka’as an hodi haki’ak dame, hodi ita bele la’o ba dezenvolvimentu ho di’ak. Dalaruma iha problema iha fatin-fatin. Horikalan iha área Bekora to’o Kuluhun, ita hadi’a dalan no halo iluminasaun ba estrada, hodi kalan ema bele la’o ho konfiansa, maibé seidauk hotu dalaruma ita preokupa, maibé nia lala’ok mak hanesan”, Xanana Gusmão hatete iha nota imprensa ne’ebé Tatoli asesu.

Nia dehan Governu kontinua konsentra esforsu atu hadi’a infraestrutura no fornese eletrisidade ba populasaun, maibé iha ema balun ne’ebé estraga infraestrutura públika.

“Antes ne’e, Dili ne’e fiu iha fatin balun sei nakonu, iha área seluk laiha ona fiu, maibé fiu sira ne’e tau iha fatin ida hodi fahe ba fatin hotu, ema buka estraga”, Xanana Gusmão lamenta.

Nia mós bolu atensaun ba Prezidente Autoridade, xefe suku, xefe aldeia no organizasaun juventude sira atu serbisu hamutuk hodi prevene asaun sira ne’ebé bele estraga infraestrutura públika.

Tuir nia, Governu haka’as an atu hadi’a rai, joven sira labele sai fali kriminozu iha rai rasik.

Xefe Ezekutivu husu mós ba Prezidente Autoridade Munisípiu (PAM) Dili atu koordena ho autoridade postu administrativu, xefe suku no xefe aldeia sira, no solisita ba PAM iha munisípiu sira seluk atu tau atensaun ba infraestrutura públika, tanba investimentu hirak ne’e uza osan públiku.

“Sira buka atu estraga, sira loke estraga odamatan Panel Ring Main Unit no Panel Low Voltage, buat ne’e atu estraga tiha de’it, ita tenke tau-matan ba buat ne’e, tanba pertense ba povu tomak iha Bekora nian”, nia apela.

Iha parte seluk, Prezidente Komisaun Ezekutiva Eletrisidade Timor-Leste, Empreza Públika (EDTL, E.P.), Paulo da Silva, lamenta mós ho asaun estraga panel eletrisidade ne’e, no hatete katak ema ne’ebé halo asaun ne’e bele mós kliente EDTL nian.

“Ita bele deskonfia katak sira selok ho buat ruma, maibé ita seidauk hatene motivu saida mak sira halo ida-ne’e”, Paulo da Silva realsa.

Nia esplika, odamatan panel ne’e nakloke no taka ladi’ak tanba estraga, maibé panel rasik sei funsiona atu fornese enerjia eletrisidade ba Dili.

Paulo da Silva salieneta katak kazu estraga infraestrutura eletrisidade la’ós akontese dala-ida de’it, tanba panel ne’ebé fornese eletrisidade ba área Bekora, ne’ebé instala besik Igreja Bekora, mós hetan estrag iha odamatan panel.

EDTL seidauk identifika ema ne’ebé halo asaun ne’e, maibé hafoin simu informasaun husi tékniku, EDTL pasa kedas informasaun ba Polísia no halo ona prosesu identifikasaun liuhusi kámera vídeo vijilánsia ne’ebé besik fatin akontesimentu.

“Odamatan aat ne’e iha impaktu tebes, tanba ema labele kaer panel tanba iha alta tensaun. Maibé, ami koordena ona ho kompañia tanba sira iha responsabilidade atu haree no hadi’a filafali”, nia dehan.

Governu ho EDTL kontinua halo esforsu atu hadi’a kualidade fornesimentu enerjia elétrika ba populasaun, maibé asaun estraga infraestrutura bele prejudika esforsu ne’e.

EDTL hamutuk ho empreza responsavel ba operasaun no manutensaun, sei monta lutu ka protesaun iha área panel sira no instala kámera vídeo vijilánsia atu reforsa seguransa no prevene estragu iha futuru.

Panel RMU no Panel LV mak elementu importante iha sistema distribuisaun eletrisidade subterráneu (underground). Panel sira-ne’e iha funsaun prinsipál atu kontrola no fahe enerjia, regula sistema voltajen no asegura fornesimentu eletrisidade ho seguransa ba komunidade, instituisaun no empreza sira iha área ne’e.

TATOLI