Resensiamentu eleitorál ba timoroan sira iha diáspora hahú iha Outubru
DILI, 27 Agostu 2026 (TATOLI)-Komisaun Nasionál Eleisaun (CNE, sigla portugés), Sekretariadu Tékniku Administrasaun Eleitorál (STAE) no Ministériu Negósiu Estranjeiru no Kooperasaun (MNEK) halo enkontru koordenasaun hodi diskute kona-ba preparasaun sira atu hala’o resensiamentu eleitorál ba sidadaun timoroan sira iha diáspora atu prepara ba Eleisaun Prezidenziál iha tinan 2027.
Prezidente CNE, José Agostinho, hatete sorumutu ne’e importante depoizde Estadu liuhusi Prezidente Repúblika no Primeiru-Ministru sente eleisaun sira ne’ebé atu mai importante ba Timor-Leste.
Tanba ne’e, prosesu hothotu tenke koordena ho di’ak husi órgaun eleitorál no STAE serbisu hamutuk ho MNEK atu halo resensiamentu molok destaka ekipa tuir fatin ne’ebé sidadaun timoroan no eleitór sira iha.
“Tanba ne’e, ohin koloka fatin balun presiza fó prioridade uluk. [Ita] iha ona esperiénsia [uluk], maibé agora diskute modalidade sira ne’ebé iha, oinsá hodi fó atendimentu di’ak liután ba sidadaun sira”, nia hatete hafoin remata sorumutu iha edifísiu CNE, Kaikoli, Dili, kinta-feira ne’e.
Dirijente ne’e hein katak servisu atendimentu ne’ebé sei hala’o fasilita sidadaun sira bele tuir resensiamentu, ba biométriku ne’ebé agora la’o ona no ba sira ne’ebé iha ona bele atualiza de’it no balun ne’ebé seidauk iha bele halo. Nune’e, bele partisipa no fó sira-nia votu ba eleisaun ne’ebé sei akontese.
Prezidente CNE seida’uk fó sai data fiksu, maibé tuir kalendáriu resensiamentu iha diáspora sei hala’o iha fulan-Outubru tinan ne’e.
Iha delegasaun ida hamutuk ho MNEK sei bá uluk hodi haree fatin no kondisaun hotu molok hala’o atendimentu.
Nia dehan, rezultadu reuniaun téknika koordenasaun ohin sei aprezenta ba Konsellu Ministru, sei apresia hodi fó desizaun, liuliu kestaun téknia balun kolokasaun fatin no kalendáriu.
“Tanba ida-ne’e, órgaun eleitorál ho STAE implementa de’it no MNEK sei iha kompeténsia atu hato’o mós diskusaun sira, nune’e engloba hotu saida mak iha”, nia dehan.
José Agostinho garante katak eleitór sira sei partisipa másima iha eleisaun mai, tanba país sai ona membru Asosiasaun Nasaun Sudeste Aziátiku (ASEAN, sigla inglés) no buat ne’ebé iha ona hakarak mellora liután.
Tuir nia, demografikamente país nia demokrásia okupa pozisaun di’ak, entaun dalan ida atu parte hotu liuliu sidadaun hotu atu serbisu hamutuk nu’udar timoroan no prontu kontribui ba susesu eleisaun sira.
Iha fatin hanesan, Diretór Konsulár MNEK, Ermonio da Silva Pinto, dehan ministériu halo ona preparasaun hodi koordena ho embaixada Timór, liuliu iha nasaun haat hanesan Austrália, Koreia Súl, Inglaterra no Portugál, identifika ona sentru resensiamentu hamutuk 17, tanba sidadaun barak hela iha ne’ebá.
Jornalista: Nelson de Sousa
Editora: Maria Auxiliadora
