Serbisu Edukasaun Baukau enkoraja estudante hasa’e morál-étika
BAUKAU, 27 Agostu 2026 (TATOLI)—Serbisu Munisipál Edukasaun (SME) Baukau enkoraja estudante sira atu hasa’e hahalok morál no étika iha sosiedade.
Diretór Serbisu Munisipál Edukasaun Baukau, Afonso dos Santos da Costa esplika, asuntu kona-ba morál no étika parte husi hahalok pesóal iha-ne’ebé parte husi atitude liuliu estudante sira nune’e la’ós responsabilidade husi manorin-na’in de’it maibé presiza entidade hotu kontribui hodi hadi’a hahalok no étika estudante sira-nian.
“Menus étika iha estudante balun hanesan situasaun ne’ebé presiza tempu naruk atu muda, tanba mudansa hahalok labele akontese kedas. Edukasaun nafatin iha papél importante atu hanorin estudante sira respeita inan-aman no ema seluk iha sosiedade,” Afonso dos Santos hateten bainhira partisipa iha diálogu kona-ba direitu labarik iha Salaun Soi Mali Administrasaun Munisipál Vila Nova, Baukau, Kinta ne’e.
Jestór Edukasaun ne’e relata parte eskola hanesan profesór tenke sai ezemplu liuhusi respeita malu no rona malu nune’e sai ezemplu ba alunu atu la’o tuir tanba menus étika la’ós problema estudante hotu, pesóal balun ladún fó importánsia ba sira-nia atitude.
Aleinde ne’e, respeitu iha valór importante iha moris sosiál tanba bainhira ema hatene respeita ema seluk, sei fásil liu atu moris hamutuk iha sosiedade.
“Husu ba eskola sira atu nafatin fahe informasaun liuhusi edukasaun sívika, hodi ajuda estudante komprende katak sira la moris mesak, maibé hamutuk ho ema seluk iha sosiedade,” Afonso dos Santos akresenta.
Entertantu, diálogu kona-ba proteje direitu labarik realiza husi ONG Mane Vizaun Foun ne’ebé hala’o durante loron rua (26-27 Agostu) iha-ne’ebé hetan partisipasaun husi estudante, Alumni Parlamentu Foinsa’e Timor-Leste, Asosiasaun Ema ho Defisiénsia, reprezentante Sekretaria Estadu Igualdade, Polísia VPU no seluk tan.
Jornalista: Natalino Belo
Editór: Xisto Freitas da Piedade
