TL Partisipa semináriu ASEAN-Japan Kona-ba Treinadór Desportivu iha Malázia
DILI, 27 Agostu 2026 (TATOLI)–Delegasaun Timor-Leste liuhusi Ministériu Juventude Desportu Arte no Kultura (MJDAK) partisipa iha semináriu Kona-ba Dezenvolvimentu enkuadramentu ba Treinadór Desportivu 2026 ne’ebé realiza husi ASEAN iha Malázia, hahú loron 24 to’o 28 fulan-Agostu 2026.
Eventu ne’e hanesan parte husi programa ASEAN-Japan Action on Sport 2026 ne’ebé foku ba hadi’a kualidade rekursu umanu iha setór desportu iha rejiaun ASEAN.
Semináriu ne’e iha objetivu prinsipál atu dezenvolve enkuadramentu ba treinadór desportivu, hametin kapasidade no kualifikasaun rekursu umanu desportivu iha nivel rejionál nomós atualiza métodu formasaun tuir padraun internasionál.
Diretór Jerál Desportu, David Tomás de Deus, dehan partisipasaun ne’e importante tebes ba dezenvolvimentu desportu iha rai-laran.
“Ho workshop ne’e ami hein katak bele lori aprendizajen foun ba dezenvolvimentu treinadór desportivu iha Timor-Leste. Ita presiza treinadór ne’ebé iha kualifikasaun no koñesimentu tuir padraun internasionál atu bele prepara ita-nia atléta sira di’ak liután ba kompetisaun rejionál no internasionál,” Diretór ne’e hateten liuhusi nota ne’ebé TATOLI asesu husi media MJDAK, ohin.
MJDAK espera katak koñesimentu no esperiénsia ne’ebé hetan husi semináriu ne’e bele aplika iha programa formasaun treinadór sira iha Timor-Leste.
Governu liuhusi MJDAK kontinua fó prioridade ba kapasitasaun rekursu umanu desportivu hanesan xave ida atu hametin prestasaun atléta Timor-Leste iha eventu sira ASEAN nian iha futuru.
Delegasaun Timor-Leste ne’ebé partisipa iha semináriu ne’e mak Diretór Jerál Desportu MJDAK, David Tomás de Deus, Vise-Prezidente Primeiru Konfederassun Desportiva Timor-Leste (CDTL), José Caetano Guterres, no Vise Sekretáriu Federasaun Voleiból Timor-Leste, Augusto da Costa Tilman.
TATOLI
