Veterináriu Vikeke rejista asu rua pozitivu raiva iha suku rua
VIKEKE, 27 Agostu 2026 (TATOLI)—Xefe Departamentu Veterináriu Munisípiu Vikeke, Domingos do Carmo Pinto, informa Veterináriu Munisípiu Vikeke rejista asu rua pozitivu rabies (raiva) iha Suku Uma-Ki’ik no Suku Bahalaraua’in, Postu Vikeke Vila, Munisípiu Vikeke.
“Iha fulan-Agostu ne’e asu tata abitante sira iha Suku Bahalaraua’in no Suku Uma-Ki’ik, nune’e ekipa veterináriu sira ba halo teste ba asu rua mak pozitivu rabies. Nune’e, daudaun ne’e, ita Munisípiu Vikeke rejista asu rua mak ita teste rezultadu sai pozitivu rabies iha Munisípiu Vikeke,” Domingos ba TATOLI iha Postu Vikeke Vila, Kinta ne’e.
Xefe Departamentu Veterináriu ne’e hatutan asu ne’ebé tata abitante iha Suku Bahalaraua’in deskoñesidu (na’in laiha), hafoin tata komunidade bá oho tiha asu ne’e tékniku veterináriu sira teste hetan pozitivu raiva.
“Atu prevene kazu raiva ami deside destaka téknika veterinária bá suku Bahalaraua’in hodi fó vasina ba asu sira. Hafoin vasina asu iha Bahalaraua’in, sei kontinua vasina iha Suku Uma-Ki’ik. Ami mós halo koordenasaun ho xefe suku Uma-Ki’ik,” nia tenik.
Kona-ba estoke ai-moru vasina, nia dehan, daudaun ne’e veterináriu nasionál distribui ona ai-moruk vasina dós sanulu (10) atu vasina asu.
Iha fatin ketak, Koordenadór Sentru Saúde Internamentu Munisípiu Vikeke, Francisco da Costa haktuir, kona-ba kazu asu tata iha fulan-Agostu 2026 rejistadu hamutuk ema na’in-lima ne’ebé baixa iha Sentru Saúde Internamentu, kodisaun atuál pasiente sira-nian di’ak hela.
“Kona-ba kazu asu tata hamutuk na’in-lima ne’ebé daudaun ne’e baixa iha internamentu. Ami sona ona ai-moruk anti-rabies ba pasiente sira. Pasiente sira-ne’e kondisaun di’ak hela, na’in-ida husi Suku Uma-Ki’ik mak alta ona, hela na’in-haat (4) husi Suku Bahalaraua’in mak sei baixa hela. Ba pasiente na’in-lima (5) ne’e, ami seidauk deteta pasiente ba kazu raiva. Maibé, asu rua mak parte veterinária deteta pozitivu raiva,” nia relata.
Enkuantu, kazu atuál asu tata iha fulan-Agostu ne’e hamutuk ema na’in-lima ne’ebé husi Suku Uma-ki’ik na’in-(1) mane ne’ebé alta ona no husi Suku Bahalaraua’in hamutuk na’in-haat (4) kompostu husi feto na’in-tolu (3), mane na’in-ida (1) ne’ebé sei baixa hela iha Sentru Saúde Internamentu Vikeke.
Jornalista: Vitorino Lopes da Costa
Editór: Xisto Freitas da Piedade
