Aban, Primeiru-Ministru bá Indonézia kontinua negosiasaun fronteira marítima

DILI, 28 Agostu 2026 (TATOLI) – Primeiru-Ministru, Xanana Gusmão, ho delegasaun sei arranka bá Indonézia, aban, hodi kontinua halo negosiasaun kona-ba fronteira marítima entre país rua.

“Aban, ha’u sei bá Indonézia, atu kontinua negosiasaun kona-ba ita-nia fronteira marítima ho Indonézia”, nia hatete iha diskursu bainhira halo abertura ba Simpóziu OceanX Timor-Leste: Siénsia ba Futuru Azúl iha Sentru Konvensaun Dili, sesta ne’e.

Lembra katak negosiasaun ba delimitasaun fronteira marítima entre Timor-Leste no Indonézia ba ronda datoluk nian halo ona, entre 27 no 29 Abríl, iha Singapura, ne’ebé marka prosesu ne’ebé signifikativu.

Husi rezultadu ne’e hothotu konkorda katak, iha fulan-Agostu tinan 2026, avansa ba ronda dahaat negosiasaun nian ne’ebé desididu atu hala’o iha Bali-Indonézia.

Notísia relevante: http://Negosiasaun Fronteira Marítima iha Singapura lori rezultadu signifikativu ba Timor-Leste no Indonézia –

Jornalista: Nelson de Sousa

Editora: Maria Auxiliadora