Almamor realiza eventu Dili Festa komemora loron konsulta popular ba-27
DILI, 28 Agostu 2026 (TATOLI)—Elevent entertaiment no Almamor sei realiza eventu Dili Festa hodi komemora loron konsulta populár (30/08/2026) ba dala-27 ho tema “Hametin amizade no promove kultura Timor-Leste”.
Eventu Dili Festa sei realiza durante loron rua hahú husi loron 29 to’o 30 fulan Agostu 2026 iha kampu futsál Kuartel Jenerál F-FDTL Fatuhada.
Prezidente Komisaun Organizadora, Boaventura Freitas, hateten Dili Festa ne’e nu’udar eventu dahuluk ne’ebé sira organiza hodi halibur hamutuk artista seniór (lendáriu) no artista foun sira hamutuk 31 no banda múzika lima.
“Entaun ami sei kolabora hamutuk hodi harame konsertu ida-ne’e, aleinde hodi komemora loron konsulta populár maibé mós atu promove no hametin amizade entre artista timoroan sira hotu. Tanba ne’e mak ami foti tema ida-ne’e, entaun hanetin pás la’ós de’it husi diálogu maibé bele mós liuhusi entertainment,” Nia relata ba jornalista sira liuhusi konferénsia imprensa ne’ebé hala’o iha INKANTO Lesidere, ohin.
Nia hatutan, eventu ne’e mós atu fó koñese kantór orijinál ida-idak nia múzika ba públiku, tanba jerasaun foun barak mak hatene múzika maibé lahatene nia kantór na’in hodi evita pláziu (copy paste) ema-nia múzika.
“Hanesan ita haree oras ne’e daudaun artista foinsa’e sira balun mak gosta pláziu ema-nia múzika sein husu lisensa ba kantór na’in, ne’e iha Indonézia bele kona multa. Entaun ita konvida artista hotu husi 1999 to’o 2026, atu hatudu sira-nia performe ho sira-nia múzika rasik,” nia dehan.
Eventu ne’e sei marka prezensa de’it husi artista timoroan no sei la envolve husi artista internasionàl (estranjeiru) ruma tanba sira hakarak promove timoroan no hatudu ba ema hotu katak Timor mós iha ninja rekursu potensiál ba entertaiment nian.
“Nune’e nia husu ba públiku atu partisipa iha eventu refere hodi komemora hamutuk ita-nia konsulta populár, tanba eventu ne’e sei loke ba públiku ho gratuitamentu. Karik hakarak sosa billete mós iha ho presu $2 maibé ne’e sei asesu ba door price hodi simu prémiu ruma ne’ebé oferese husi setór públiku no bele sosa sasán sira iha feira laran ne’e MKI organiza hamutuk stand 20,” nia apela.
Eventu ne’e hetan apoiu fundu husi Ministériu Koordenadór Asuntu Sosiál no Ministériu Juventude Desportu Arte no Kultura inklui setór privadu sira ho montante rihun $20-resin.
Enkuantu programa ba eventu Dili Festa kompostu husi divertimentu (konsertu) husi artista solo, banda no DJ, sei iha mós dansa kukturál, fashion show iha red carpet, espozisaun feira no door price.
Jornalista : Alexandra da Costa
Editór : Cancio Ximenes
