Autoridade Irabin de Baixo hahú implementa alargamentu sede suku
VIKEKE, 28 Agostu 2026 (TATOLI)—Xefe Suku Irabin de Baixo, Postu Administrativu Uatukarbau, Munisípiu Vikeke, José Baptista do Carmo, informa planu alargamentu Sede Suku Irabin de Baixo ne’ebé liuhusi Programa Nasionál Dezenvolvimentu Suku (PNDS) ba tinan 2026 foin iha faze hada fondasi.
“Kona-ba planu alargamentu sede suku ami-nian foin daudaun ne’e mak badaen sira ke’e fondasi no konstrui fondasi nian no semana ida-ne’e hotu komesa hada batako sira, nune’e ita haree progresu fíziku atuál ne’e foin mak atinje 25%,” José Baptista ba TATOLI, iha Postu Uatukarbau, Sesta ne’e.
Autoridade Komunitária ne’e relata alargamentu Sede Suku Irabin de Baixo ne’e aumenta 6mx6m, iha-ne’ebé antes ne’e ho medida 12mx7m.
“Ha’u sente alargamentu ne’e konstrui kuartu rua hodi funsionáriu suku na’in-haat ne’ebé koloka iha suku uza ba atendimentu servisu suku nian. Maski ita halo alargamentu ona, maibé ita haree sei kloot tanba ita halo enkontru ruma labele akumula hotu ita-nia komunidade,” nia subliña.
Nia dehan bá-oin mak orsamentu alargamentu sede suku nian autoridade suku hamutuk ho konsellu suku sira sei tau nafatin ba planu hodi halo alargamentu sede suku, atu iha enkontru ruma iha suku bele sufisiente ba populasaun suku.
Obra alargamentu Sede Suku Irabin de Baixo liuhusi orsamentu PNDS hamutuk rihun $14, ne’ebé konstrui husi badaen lokál sira husi suku referidu, durasaun konstrusaun fulan tolu (3), banefísia populasaun hamutuk 2.624 husi aldeia hitu kompostu husi Aldeia Taradiga, Macausa, Macaqui, Beturia, Uatodere, Taradai no Lacoloro Hoo.
Jornalista: Vitorino Lopes da Costa
Editór: Xisto Freitas da Piedade
